Qyzylordada áıeliniń beti-qolyn baltamen shapqan adamǵa qatysty sot úkimi shyqty

QYZYLORDA. KAZINFORM – Qyzylorda oblysy Shıeli aýdanynyń Bala bı aýylyndaǵy jaýyzdyq áreket boıynsha sot úkimi shyqty. 44 jastaǵy er adam áıeliniń beti-qolyn baltalap tastaǵany úshin qamaýǵa alynǵan bolatyn.

Qylmystyq ister jónindegi oblystyq mamandandyrylǵan aýdanaralyq sot Qylmystyq kodekstiń 24-babynyń 3-bóliginde, 99-baby 2-bóliginiń 3, 5-tarmaqtarynda kózdelgen qylmysty jasaǵan dep aıyp taǵylǵan sottalýshynyń isin qarady.

– Sottalýshy óziniń otbasymen birge turatyn turǵylyqty meken-jaıynda 19.04.2025 jyly tańǵy saǵat 4-ke taman oıanyp, nekedegi jubaıy uıyqtap jatqanda as bólmesinde turǵan aǵash baltany alyp kelip, jábirlenýshiniń oń jaq bet tusynan, oń jaq ıegi, oń jaq ıyǵy, oń qol bilegi, bilezik býyny, alaqan ústi, sol qol bilegi tusynan birneshe márte asa qatygezdikpen toqtaýsyz soqqy jasaǵan. Sol kezde qyzy bólmege kirip qalyp, qylmysyn aqyryna deıin jetkize almaı, baltasyn tastap, syrtqa shyǵyp ketken. Sottalýshynyń adam óltirýge oqtalǵan qylmystyq áreketinen jábirlenýshi aýyr dene jaraqattaryn alǵan, - delingen sot habarlamasynda.

Vedomstvonyń málimetinshe, memlekettik aıyptaýshy sottalýshyny 18 jylǵa bas bostandyǵynan aıyrýdy surady.

– Jábirlenýshi jáne onyń ókilderi sottalýshyǵa qatysty zańǵa sáıkes jaza taǵaıyndaýdy surady. Alaıda memlekettik aıyptaýshy suraǵan jaza tym kóp bolǵandyqtan oǵan 10 jyldan aspaıtyn jaza berýdi surady. Sot úkimimen sottalýshy Qylmystyq kodekstiń 24-babynyń 3-bóligine, 99- babynyń 2-bóliginiń 3, 5-tarmaqtaryna sáıkes kináli dep tanylyp, oǵan 15 jylǵa bas bostandyǵynan aıyrý jazasy taǵaıyndaldy, - delingen resmı habarlamada.

Úkim zańdy kúshine engen joq.

Biz buǵan deıin bul is boıynsha Qylmystyq kodekstiń adam óltirýge oqtalý babymen qylmystyq is qozǵalǵanyn, polıtsııa kúdiktini izin sýytpaı ustap, ýaqytsha ustaý ızolıatoryna qamaǵanyn jazǵanbyz.

Tergeý amaldary jalǵasyp jatqandyqtan ózge málimet jarııalanbaıdy.