Qyzylordada áıelin uryp-soqqan ІІІ top múgedegine qatysty tergeý bastaldy
QYZYLORDA. KAZINFORM – Qyzylorda qalalyq polıtsııa basqarmasy kúıeýi uryp-soqqan áıeldiń áleýmettik jelidegi vıdeosyna qatysty túsinik berdi.
Jýrnalıst Jazıra Begaly 25 naýryz kúni Facebook áleýmettik jelisinde Qyzylorda qalasy Tasbóget kentiniń turǵyny Sáýle Ákimovanyń turmystyq zorlyq-zombylyq qurbany bolǵany týraly jazba jarııalady.
- Áıel aýrýhanada tazalyqshy bolyp jumys isteıdi. Eriniń soqqysynan eki qabyrǵasy shytynap ketkenin aıǵaqtaıtyn anyqtama bar. Jábirlenýshiniń aıtýynsha, jubaıy qyzǵanyp, jıi uryp-soǵady, - delingen jazbada.
Qalalyq Polıtsııa basqarmasy densaýlyqqa qasaqana ortasha aýyrlyqta zııan keltirý deregi boıynsha tergeý bastalǵanyn málimdedi.
- Azamatsha eki balasymen birge daǵdarys ortalyǵyna ornalastyryldy. Olarǵa jan-jaqty psıhologııalyq, quqyqtyq kómek jáne áleýmettik qoldaý kórsetilip jatyr. Otbasyn zorlyq-zombylyqtan qorǵaý maqsatynda kúdiktige (ІІІ top múgedegi) qatysty qorǵaý nusqamasy shyǵaryldy. Basqarmanyń otbasylyq-turmystyq zorlyq-zombylyqqa qarsy kúres bólimshesiniń qyzmetkerleri tıisti profılaktıkalyq jumys júrgizip jatyr, - dedi basqarmanyń bólimshe bastyǵy Láıla Týysbaeva.
Qylmystyq is oblystyq Polıtsııa departamenti basshylyǵynyń baqylaýynda.
Eske salsaq, elimizde jyl saıyn polıtsııaǵa turmystyq zorlyq-zombylyq týraly 100 myńnan astam habarlama túsedi.