Qyzylordada avtobýstar bir kúnge kitaphanaǵa aınaldy
QYZYLORDA. KAZINFORM – Qyzylordada dástúrli «Ádebı avtobýs» jobasy aıasynda «Kitap QALA» atty merekelik shara ótti. Qalalyq ortalyqtandyrylǵan kitaphanalar júıesi ony 23 – sáýir Ulttyq kitap kúnine arnady.
Baǵyty temirjol vokzalynan bastalatyn №1 qoǵamdyq kóliktiń ishi-syrty dáıekti sózdermen, sharlarmen bezendirildi. Kitaphanashylar qala turǵyndaryna kitapqa baılanysty halyqaralyq jobalardy tanystyrdy.
– Bıyl alǵash ret kúntizbege engizilgen ataýly kúnge oraı elimizdiń, onyń ishinde oblys kitaphanalarynda ulttyq kitap aptalyǵy ótip jatyr. Bul mereke ana tilimizdegi ulttyq tanymdyq kitaptardyń nasıhattalýyna, shyǵarma avtorlarynyń bedelin arttyrýǵa qozǵaý salady dep esepteımin, – dedi qalalyq kitaphananyń kitaphanashysy Nurgúl Tóleýbaı.
Shara barysynda kitaphananyń belsendi oqyrmandary aqyn-jazýshylardyń óleńderin mánerlep oqysa, kishkentaı ónerpazdar ánnen shashý shashty. Ártúrli vıktorınalyq suraqtarǵa jaýap berip, maqal-mátelderdiń jalǵasyn, jumbaqtardyń sheshimin tapqan jolaýshylarǵa syılaqtar berildi.
Bul is-sharaǵa «Aýyl» partııasy Qyzylorda oblysy boıynsha óńirlik fılıaly, Tekeı batyr Qarpyquly atyndaǵy joǵary kolledjiniń quryltaıshysy Mırambek Isaev demeýshilik jasady.
Ulttyq kitap kúni aıasynda ótetin is-sharalar aptalyǵy QR Mádenıet jáne aqparat mınıstrliginiń qoldaýymen QR Ulttyq akademııalyq kitaphanasynda ótken «Ult jáne ulttyq kitap» atty ashyq esik kúninen bastalǵan bolatyn.