Qyzylordada avtobýsqa soǵylǵan jeńil kóliktegi eki adam qaza boldy

QYZYLORDA. KAZINFORM — Qyzylorda oblysynda avtobýsqa soǵylǵan jeńil kóliktiń júrgizýshisi men jolaýshysy oqıǵa ornynda qaıtys boldy.

Oqıǵa 19 jeltoqsanda «Shymkent-Samara» tas jolynyń Qarmaqshy aýdanynyń tusyndaǵy bóliginde tirkeldi. «Youtong» markaly avtobýsy jáne «Nissan» jeńil avtokóliktiń soqtyǵysýy saldarynan jol-kólik oqıǵasy boldy.

— Saldarynan «Nissan» júrgizýshisi jáne bir jolaýshysy oqıǵa ornynda qaıtys bolǵan. Taǵy bir jolaýshy ártúrli dene jaraqatymen medıtsınalyq mekemege jatqyzyldy. Bul boıynsha sotqa deıingi tergeý júrgizilýde, qorytyndysy boıynsha protsestik sheshim qabyldanatyn bolady, — dep málim etti Qyzylorda oblystyq polıtsııa departamentinen.

Vedomstvo ókilderi qys mezgilinde jolda barynsha saq bolý kerektigin eskertedi.

— Kóktaıǵaq pen nashar kóriný jaǵdaıynda erekshe muqııat bolý qajet. Jyldamdyqty azaıtyp, araqashyqtyqty saqtaý jáne joldyń jaǵdaıyn eskerý óte mańyzdy, — dep atap ótti mamandar.

Eske salsaq, budan buryn aýa raıynyń buzylýyna baılanysty Aqtóbe, Qyzylorda oblystarynda jol jabyldy.