Qyzylordada aýrýhana ákimshiligi ana men balany perzenthanadan dýmandatpaı shyǵaryp alýdy talap etti

QYZYLORDA. KAZINFORM — Qyzylorda oblysy Shıeli aýdandyq aýrýhanasynyń ákimshiligi kelýshilerden dúnıege sábı ákelgen anany perzenthanadan dýmandatpaı shyǵaryp alýǵa shaqyrdy. Bul týraly medıtsınalyq uıymnyń Facebook áleýmettik jelisindegi paraqshasynda jarııalandy.

— Kún saıyn saǵat 12-den bastap jumys ýaqytynyń sońyna deıin aýdandyq aýrýhana aldy toıdaǵydaı ý-shýǵa, kólik, shoýǵa, anımatorǵa tolady. Birneshe ret eskertý jasalǵanyna qaramastan dýmandy is-shara tyıylar emes. Turǵyndar jańa bosanǵan anaǵa, ómirge kelgenine jeti kún tolmaǵan balaǵa erekshe kútim men tynyshtyq kerek ekenin bile tura ánshiler men anımatorlardy jaldap, kontsert uıymdastyrýdy ádetke aınaldyrǵan, — delingen habarlamada.

Aýdandyq aýrýhana kópbeıindi bolǵandyqtan basqa bólimshelerde aýyr jaǵdaıdaǵy naýqastar jatady.

— Olardyń tileýin tilegen týystarynyń jaǵdaıyna adamı turǵydan túsinistikpen qaraǵan jón. Perzenthana reanımatsııasynda da óz ómiri úshin kúresip jatqan náresteler bar ekenin esten shyǵarmaý kerek. Náreste de týǵannan keıingi alǵashqy kúnderde anasy sııaqty tynyshtyq pen demalýdy qajet etedi. Bosanǵan ana sharshaıdy jáne ol ádettegi jaǵdaıda balasymen tynyshtyqta bolǵysy keledi. Bul oraıda qaýmalap kelgen týǵan týystyń ý-shýy jáne qatty mýzyka jańa týǵan náresteniń estý qabiletine zaqym keltirýi, tipti nárestede nevrologııalyq másele týdyrýy múmkin. Sondyqtan aýrýhana aınalasynda, perzenthana mańynda balany shyǵaryp alýǵa kelgende shoý-baǵdarlama jasap, túrli anımator jaldamaýdy talap etemiz, — dep habarlady aýrýhana ákimshiligi.

Biz buǵan deıin Oral qalasynyń turǵyny Aızada Qubasheva dúnıege úshem alyp kelgenin jazǵanbyz.