Qyzylordada aýyz sýdaǵy hlorıd pen sýlfat mólsheri normadan joǵary shyqty
QYZYLORDA. KAZINFORM — Qyzylordada aýyzsýdyń sapasy tekserilip, birqatar synamadan sáıkessizdik anyqtaldy.
Qyzylorda oblysynda óńir turǵyndaryn sapaly ári qaýipsiz aýyzsýmen qamtamasyz etý máselesi turaqty baqylaýda. Oblystyq sanıtarııalyq-epıdemıologııalyq baqylaý departamenti bıyl alǵashqy jarty jylda monıtorıng sheńberinde ortalyqtandyrylǵan sýmen jabdyqtaý obektilerinen mıkrobıologııalyq kórsetkish úshin 570-ten astam sý synamasyn aldy.
— Synamalardyń 20-dan astamy talapqa sáıkes kelgen joq, bul — jalpy kórsetkishtiń 3,64%-y. Sanıtarııalyq-hımııalyq kórsetkishter boıynsha 580-nen astam synama alynyp, onyń 40 shaqtysynda sáıkessizdik anyqtaldy. Talapqa saı kelmeıtin synamalardyń úles salmaǵy — 6,88%. Sý quramynda kóbine qurǵaq qaldyq, hlorıd jáne sýlfattyń normadan joǵary ekeni anyqtaldy, — dedi departament basshysy Gúlmıra Syzdyqova.
Budan buryn Shyǵys Qazaqstan oblysynda shomylý maýsymy bastalǵaly beri mamandar halyq kóp demalatyn oryndardan 120-dan astam sý synamasyn alyp, zerttegenin jazǵan edik.
