Qyzylordada aýyr atletıkadan respýblıkalyq týrnır bastaldy
QYZYLORDA. KAZINFORM – Búgin Qyzylorda oblysynda eresekter arasynda Qazaqstannyń Eńbek sińirgen kórnekti jattyqtyrýshysy, bilikti bapker Velorıı Pak júldesine arnalǵan respýblıkalyq týrnır bastaldy. Bul týraly oblystyq dene shynyqtyrý, sport jáne týrızm basqarmasynyń baspasóz qyzmeti habarlady.
Velorıı Pak baýlyǵan shákirtter arasynda Ilıa Ilın, Almas Óteshov, Qýanysh Rahatov, Shın Oleg, Roman Rýsınovskıı, Aleksandr Zaıchıkov syndy aýyr atletıka alyptary bar. Odan bólek 60-tan astam sport sheberin, halyqaralyq dárejedegi 12 sport sheberin jáne Qazaqstanǵa eńbek sińirgen 3 sport sheberin daıyndady.
– Kórnekti jattyqtyrýshynyń júldesine arnalǵan respýblıkalyq týrnırde elimizdiń ár óńirinen kelgen 10 komanda, 100-ge jýyq ziltemirshi baq synamaq. Olar erler jáne áıelder bólinisi boıynsha 8 salmaq dárejesinde synǵa túsedi, - delingen habarlamada.
Saltanatty is-sharanyń ashylýyna oblys ákiminiń orynbasary Meırambek Shermaǵanbet, qurmetti jattyqtyrýshy Velorıı Pak, oblystyq aýyr atletıka federatsııasynyń prezıdenti Temirhan Kenjebaev qatysty.
– Dańqty sportshylardy tárbıelegen dara tulǵanyń júldesine arnalǵan búgingi týrnırdiń mańyzy erekshe. Sebebi ár aımaqtan jınalǵan myqty ziltemirshiler jarys alańynda múmkindigin kórsetip, jeńiske degen jigerin tanytady. Osy oraıda barlyq sportshyǵa sáttilik, dúbirli dodada shyn myqtynyń jeńiske jetýin tileımin, - dedi Meırambek Shermaǵanbet.
Іs-shara barysynda oblys ákiminiń orynbasary qurmetti jattyqtyrýshyǵa oblys ákiminiń alǵys hatyn tabystap, qurmet kórsetti. Velorıı Pak týrnırdi joǵary deńgeıde uıymdastyrýǵa atsalysqan jankúıerlerge, sportshylar men sala qyzmetkerlerine rızashylyǵyn bildirdi.
Ziltemirshiler arasyndaǵy tartysty báseke bıyl alǵash ret qolǵa alynyp, ony jyl saıyn halyqaralyq deńgeıde uıymdastyrý josparlanyp otyr. Jarys 13 tamyzǵa deıin jalǵasady, úzdikterge qomaqty syıaqy men arnaıy medaldar tabystalady.
Eske salsaq, buǵan deıin qazaqstandyq aýyr atlet Matveı Makrýshın elordada ótip jatqan jasóspirimder men jastar arasyndaǵy Azııa chempıonatynda kúmis medalǵa ıe boldy.