Qyzylordada aýyl sharýashylyǵy sanaǵyna jumyssyzdar men stýdentter tartylady

QYZYLORDA. KAZINFORM — Bıyl 1 tamyz ben 20 qazan aralyǵynda elimizde ulttyq aýyl sharýashylyǵy sanaǵy ótedi.

Sanaq barysynda Qyzylorda oblysynan 89 myńnan astam úı sharýashylyǵy, 11 myńǵa jýyq aýyl sharýashylyǵy óndirýshisi qamtylady degen jospar bar.

— Mańyzdy naýqanǵa daıyndyq 1,5 jyl buryn bastalǵan. Úkimet deńgeıinde arnaıy komıssııa quryldy. Osy ýaqyt ishinde qajetti normatıvtik-quqyqtyq aktiler bekitildi. Ótken jyly biz Qyzylorda qalasynda, Syrdarııa aýdanyndaǵy A.Toqmaǵanbetov jáne Qazaly aýdanyndaǵy Ǵ.Muratbaev aýyldarynda pılottyq aýyl sharýashylyǵy sanaǵyn ótkizdik. Onda aqparattyq júıelerimizdi, ádistememiz ben dala jumystaryn uıymdastyrýdyń erekshelikterin synap kórdik, — dedi Ulttyq statıstıka bıýrosy Qyzylorda oblysy boıynsha departamentiniń basshysy Qaırat Ábsultanov.

BUU Azyq-túlik jáne aýyl sharýashylyǵy uıymynyń halyqaralyq usynysyna sáıkes sanaq ár bes-on jyl saıyn ótip turýy kerek. Biraq Qazaqstanda sanaqtyń bul túri 2006-2007 jyldary ǵana júrgizilgen. 

— Sodan beri úlken úzilis boldy. Ol kezde sanaq ósimdik sharýashylyǵy jáne mal sharýashylyǵy kezeńderin qamtydy. Al bıyl barlyǵy bir mezette ótedi. Sanaq júrgizýge jumyssyz azamattar men stýdentter, sondaı-aq nıet bildirgender sanatynan 200-ge tarta adamdy ıntervıýer retinde jumysqa tartýdy josparlap otyrmyz, — dedi Qaırat Ábsultanov.

Negizgi sanaq bastalǵanǵa deıin mamandar 1-30 maýsym aralyǵynda Aral, Qazaly, Baıqońyr qalalarynda jeke qosalqy sharýashylyqtaryn aralaıdy. Saýalnamadan ótýi tıis úı sharýashylyqtarynyń tizimin naqtylaıdy. 

Sanaqtyń negizgi kezeńi 1 tamyz ben 20 qazan aralyǵyn qamtıdy. Onyń ózi onlaın jáne oflaın kezeńderge bólinedi. Onlaın túrde ótý yńǵaıly bolý úshin jergilikti ákim apparattary men aýdandyq statıstıka bólimsheleriniń ǵımarattarynda ózine-ózi qyzmet kórsetý aımaqtary uıymdastyrylady. 

Aıta keteıik, elimizde Ulttyq aýyl sharýashylyǵy sanaǵyn ótkizýge 3,7 mlrd teńge somasynda qarjy bólindi.