Qyzylordada aýyl balasy uıaly telefonǵa arnalǵan qaýipsiz júıe oılap tapty
QYZYLORDA. KAZINFORM – Nurıslam Aıbekuly Qyzylorda oblysy Syrdarııa aýdanynyń Shaǵan aýylyndaǵy №37 mektep-lıtseıdiń 7-synybynda oqıdy.
Ol jýyrda oblys ortalyǵynda ótken «InnoFest Qyzylorda» ınnovatsııalyq IT jobalar festıvalinde baǵdarlamalyq jasaqtama baǵyty boıynsha І oryn ıelendi. Jas ónertapqysh uıaly telefonǵa arnalǵan Extrnos atty júıeni usynǵan bolatyn. Keıipkerimiz ıdeıasyn jetekshisi, №37 mektep-lıtseıdiń ınformatıka pániniń muǵalimi Gúlzat Ybyraımen birge júzege asyrǵan.
– Men aldymen aǵylshyn programmısi Terrı Devıstiń 64-bıttik operatsııalyq júıesin zerttep, qadaǵaladym. Soǵan uqsas júıe oılap tapqym keldi. Nátıjesinde Extrnos atty joba dúnıege keldi, oǵan 7 aı ýaqyt jumsadym. Bul – uıaly telefonǵa arnalǵan, Android pen iOS-qa qaraǵanda myqty ári qaýipsiz júıe. Telefondy hakerlik shabýyldardan qorǵaýǵa, baılanys quralynyń jyldam qozǵalýyna, ıaǵnı qatyp qalmaýyna múmkindik beredi, - dedi Nurıslam Aıbekuly.
Keıipkerimizdiń ınformatıkaǵa qyzyǵýshylyǵy 7 jasynan bastalǵan. Muny baıqaǵan muǵalimi yntasyn arttyryp, pán olımpıadalary men túrli baıqaýlarǵa qatysýyna yqpal etti. Nurıslam Qyzylorda startaptar men ІT óńirlik habynyń jetekshisi Janarys Túbekbaevtan sabaq alyp, jańa tehnologııanyń qyr-syryna qanyqty. Ol joba jasaý barysynda Bootloader jasaý, ıaǵnı operatsııalyq júıeni iske qosý qıyndyq týdyrǵanyn aıtty.
– Bul júıeni ornatý úshin telefonda Android, Raspberry Pi, ARM64 arhıtektýrasy bolýy kerek. Telefonǵa ony kompıýter arqyly ornatamyz. Joba aıaqsyz qalmaıdy, áli jumys atqaramyz. Tolyq aıaqtaýǵa birshama ýaqyt qajet, - dedi jas ónertapqysh.
Eske salsaq, Qyzylorda qalasyndaǵy Nazarbaev zııatkerlik mektebiniń 9-synyp oqýshysy Gaýhar Marat jýyrda Qazaq handyǵy dáýirin jańasha sıpatta tanytatyn «Altyn taq» tanymdyq ústel oıynyn qurastyrdy.