Qyzylordada aýdıt talabyn buzǵan 100-den astam laýazymdy tulǵa jaýapqa tartyldy
QYZYLORDA. KAZINFORM – Qyzylorda oblysy boıynsha ishki memlekettik aýdıt departamenti 2026 jyldyń 9 aıynda atqarǵan jumysyn qorytyndylady.
Aýdıtorlyq is-shara barysynda, sonymen qatar QR QM Іshki memlekettik aýdıt komıtetiniń tapsyrmasy, prokýratýra organdarynyń usynysy jáne tekserý komıssııasynyń materıaldary negizinde ákimshilik quqyqbuzýshylyqtar anyqtaldy.
- Osyndaı aýdıt obektileriniń 103 laýazymdy tulǵasyna qatysty 336 ákimshilik hattama toltyryldy. Esepti kezeńde aýdıtorlyq is-sharalarǵa sáıkes zańnama talaby buzylǵan 5 aýdıt materıaly protsessýaldyq sheshim qabyldaý úshin quqyq qorǵaý organdaryna joldandy, - dedi departament basshysy Erbol Kúzembaev.
Vedomstvo qyzmetkerleri aýdıtorlyq is-shara nátıjesinde buzýshylyqtardy anyqtap, oǵan jol bergen laýazymdy tulǵalardyń jaýapkershiligin qaraý týraly nusqamalar berdi.
- Zańsyzdyqtardyń aldyn alý baǵytynda da qarqyndy jumys atqaryldy. Atap aıtqanda, memlekettik satyp alý salasyndaǵy buzýshylyqtardyń aldyn alý maqsatynda kameraldyq baqylaý ornatylǵan. Eńbekaqy tóleýge qatysty buzýshylyqtardyń aldyn alý úshin onlaın bıýdjettik monıtorıng quraldary qoldanylyp, onlaın rejımde qarjylyq tártiptiń saqtalýy qatań baqylaýda, - dedi Erbol Kúzembaev.
Buryn habarlaǵanymyzdaı, QR Densaýlyq saqtaý mınıstrliginiń arnaıy monıtorıng toby Qostanaı oblysyndaǵy akýsherlik, gınekologııalyq jáne pedıatrııalyq qyzmetterdiń jumysyna keshendi aýdıt júrgizip jatyr.
