Qyzylordada aýdıt nátıjesinde bıýdjet qarajatyn urlaý derekteri anyqtaldy
QYZYLORDA. KAZINFORM – Qyzylorda oblysy boıynsha ishki memlekettik aýdıt departamentiniń qyzmetkerleri bıyl І toqsanda 27 aýdıtorlyq zańsyzdyqty anyqtady.
Onyń bir bóligi bıýdjet jáne memlekettik satyp alý týraly zańnama talaptarynyń saqtalmaýy saldarynan tirkelgen.
- Qarjylyq zańsyzdyqqa jol bergender tártiptik jaýapkershilikke tartyldy. Aýdıtorlyq is-shara nátıjesinde, sonymen qatar Іshki memlekettik aýdıt komıtetiniń tapsyrmasy, prokýratýra organdarynyń usynysy men tekserý komıssııasynyń materıaldary negizinde ákimshilik quqyq buzǵan aýdıt obektileriniń 84 laýazymdy ókiline qatysty 135 ákimshilik hattama toltyrylyp, keltirilgen shyǵyn tolyǵymen bıýdjetke óteldi. Quqyq qorǵaý organdaryna joldanǵan materıaldar aıasynda bıýdjet qarajatyn urlaý, artyq aýdarý faktileri bar 3 aýdıt materıaly protsessýaldyq sheshim qabyldaý úshin oblystyq prokýratýraǵa joldandy, - dedi departament basshysy Erbol Kúzembaev.
2024 jyldyń qazan aıynda eńbekaqy tóleminiń zańdylyǵyn baqylaýǵa múmkindik beretin «Onlaın bıýdjettik monıtorıng» aqparattyq júıesi paıda boldy.
- Bul arqyly qyzmetkerge tıesili emes kartalyq shotqa aqsha qarajatyn aýdarý, qyzmetkerlerge artyq tólem jasaý, eńbekke ýaqytsha jaramsyzdyq paraǵy boıynsha artyq tóleý, bir aıda 1 mln teńgeden astam qarajat aýdarý jáne bekitilgen ortasha laýazymdyq eńbekaqydan artyq qarajat aýdarý sııaqty keleńsizdikterge tosqaýyl qoıýǵa bolady. Alǵashynda baqylaý bilim salasy qyzmetkerleri arasynda júrgizilse, ótken jyldan bastap densaýlyq saqtaý, sport jáne medıtsına salasy qyzmetkerleri qatarǵa qosyldy. Monıtorıng nátıjesinde jyl basynan beri osy uıymdarǵa qatysty 652 tólem táýekeli boıynsha 92 habarlama joldandy, - dedi Erbol Kúzembaev.
Buǵan deıin Almaty oblysy boıynsha tekserý komıssııasy Jambyl aýdanyndaǵy memlekettik mekemelerge júrgizilgen aýdıt barysynda zańbuzýshylyqtardy anyqtaǵan bolatyn.
