Qyzylorda oblysynda aýa raıyna baılanysty jol jabyldy

ASTANA. KAZINFORM — QazAvtoJol Qyzylorda oblysynda kólik qozǵalysyna shekteý qoıylǵanyn habarlady. 

— 2025 jylǵy 24 jeltoqsan saǵat 06:00–de aýa raıynyń buzylýyna baılanysty «RF shekarasy — Mártók — Aqtóbe — Qarabutaq — Qyzylorda — Shymkent — Taraz — Qordaı — Almaty — Qorǵas — QHR shekarasy» avtojolynyń 1522-1806 shaqyrym aralyǵyndaǵy ýchaskesinde (№ 99 stantsııasynan Qyzylorda qalasyna deıin) kóliktiń barlyq túriniń qozǵalysyna shekteý qoıylady, — delingen habarlamada.

Joldy búgin saǵat 12:00–de ashý josparlanǵan. 

Eske salaıyq, táýlik boıy qosymsha aqparatty 1403 baılanys ortalyǵyna habarlasyp, alýǵa bolady. 

Buǵan deıin Aqmola jáne Qaraǵandy oblystarynda respýblıkalyq mańyzy bar avtojoldarda kóliktiń barlyq túrine engizilgen shekteý alynyp, qozǵalys qalpyna keltirildi.