Qyzylordada ashyq júrekke ota joǵary medıtsınalyq tehnologııa kómegimen jasalady
QYZYLORDA. KAZINFORM – Qyzylorda oblysynda ashyq júrekke ota oblystyq kópbeıindi aýrýhanada jasalady. Odan bólek koronarografııa, koronarlyq arterııalardy stentteý, arıtmologııalyq ota, júrek yrǵaǵyn qalpyna keltiretin zamanaýı qurylǵylardy ımplanttaý keńinen júrgizilip keledi.
- Jyl saıyn kardıoortalyqta 4 myńnan astam patsıent statsıonarlyq em alady. Onyń 3 myńǵa jýyǵyna koronarografııa jasalady. Al olardyń 1300-den astamyna koronarlyq arterııalarǵa stent ornatylady. 400-ge jýyq patsıentke júrek-qantamyr júıesine kúrdeliligine qaraı, onyń ishinde ashyq júrekke ota jasalady, - dedi aýrýhananyń kardıohırýrgııa bóliminiń meńgerýshisi, kardıohırýrg dáriger Berik Dáýitbaev.
Ortalyqtyń 17 jyldyq qyzmetinde 31 jańa medıtsınalyq tehnologııa tájirıbege endi. Sonyń ishinde joǵary tehnologııalyq medıtsınalyq kómektiń biri – keýde qýysyn kespeı, shaǵyn ınvazıvti ádispen ashyq júrekke ota jasaý. Bul ádis naýqastardyń tezirek saýyǵyp, kóp uzamaı ádettegi ómirine oralýǵa múmkindik beredi.
- Buryn júrek dertimen aýyrǵan, ashyq júrekke otany qajet etken em alýshylar tek Syzǵanov atyndaǵy ulttyq hırýrgııa ortalyǵyna júginetin. Onyń ózinde ortalyqta jyl saıyn jasalatyn ota sany 700-den aspaıdy. Kóptegen jerlesimiz kezegin kútý barysynda qaıtys bolyp ketetin. Búginde kardıoortalyqta júrektiń ıshemııalyq, týa bitken jáne júre paıda bolǵan aqaýy, júrek yrǵaǵynyń buzylysy kezinde joǵary tehnologııalyq dıagnostıka men emdeýdiń negizgi túrleri kórsetiledi, - dedi Berik Dáýitbaev.
Aıta keteıik, buǵan deıin biz Almatydaǵy júrek-qan tamyry aýrýyna shaldyqqan naýqastarǵa joǵary tehnologııalyq medıtsınalyq kómek kórsetetin qalalyq kardıologııalyq ortalyqtyń jumysy týraly jazǵanbyz.
