Qyzylordada ashyq aspan astyndaǵy ekologııalyq kezdesý ótti
QYZYLORDA. KAZINFORM — Búgin Qyzylorda qalasynyń Prezıdent saıabaǵynda 5 maýsym — Ekolog kúni jáne Dúnıejúzilik qorshaǵan ortany qorǵaý kúnine oraı ashyq aspan astynda «Ekolog saǵaty» atty ekologııalyq tanymdyq is-shara uıymdastyryldy.
Іs-sharanyń basty maqsaty — turǵyndar arasynda ekologııalyq mádenıetti qalyptastyrý, qorshaǵan ortany qorǵaýdyń mańyzdylyǵyn túsindirý, tabıǵı resýrstardy utymdy paıdalaný jáne ekologııalyq jaýapkershilikti arttyrý.
Tabıǵat aıasynda ótken mazmundy kezdesýge sala mamandary men ekolog ǵalymdar qatysyp, qorshaǵan ortany qorǵaý baǵytyndaǵy ózekti máseleler tóńireginde pikir almasty.
Atap aıtqanda, Qyzylorda oblysy boıynsha Ekologııa departamentiniń Qorshaǵan ortany qorǵaý aǵa menedjeri Hadısha Ábdibaıqyzy, Álıhan Bókeıhan atyndaǵy Qazaq orman sharýashylyǵy ǵylymı-zertteý ınstıtýtynyń Qyzylorda fılıalynyń dırektory, aýyl sharýashylyǵy ǵylymdarynyń kandıdaty, qaýymdastyrylǵan professor Samalbek Orazbaıuly jáne Qorqyt Ata atyndaǵy Qyzylorda ýnıversıtetiniń bıologııa ǵylymdary boıynsha (PhD) fılosofııa doktory, qaýymdastyrylǵan professor mindetin atqarýshy Nurgúl Saǵyndyqqyzy baıandama jasap, ekologııalyq ahýal, tabıǵatty saqtaý mádenıeti, jasyl aımaqtardy kóbeıtý, sý resýrstaryn tıimdi paıdalaný jáne qorshaǵan orta tazalyǵy jóninde oı-pikirlerimen bólisti.
Іs-shara barysynda qatysýshylarǵa qaldyqtardy suryptaý, energııa men sýdy únemdeý, tabıǵatqa janashyrlyqpen qaraý jáne tazalyq saqtaý máseleleri keńinen túsindirildi.
Sonymen qatar, elimizde júzege asyrylyp jatqan ekologııalyq bastamalardyń mańyzdylyǵy aıtylyp, turǵyndardy tabıǵatty qorǵaýǵa belsendi atsalysýǵa shaqyryldy.
Tabıǵatty qorǵaý — barshamyzǵa ortaq mindet!
