Qyzylordada Asanáli Áshimovtiń qatysýymen halyqaralyq teatrlar festıvali ashyldy
QYZYLORDA. KAZINFORM — N.Bekejanov atyndaǵy Qyzylorda oblystyq qazaq akademııalyq mýzykalyq drama teatrynyń 70 jyldyq mereıtoıyna oraı KSRO Halyq artısi Sábıra Maıqanova atyndaǵy halyqaralyq teatrlar festıvali ashyldy.
Oǵan Qazaqstannyń Eńbek Eri, Halyq artısi Asanáli Áshimov, Qazaqstannyń Halyq artısi, Teatr qaıratkerleri odaǵynyń tóraǵasy, rejısser Tuńǵyshbaı Jamanqulov qatysty.
Saltanatty rásimde oblys ákimi Nurlybek Nálibaev mádenıet jáne rýhanııat salasynda atqarylǵan jumystarǵa toqtaldy. Jıynda óńir mádenıetine eleýli úles qosqan sala mamandary marapattaldy.
Asanáli Áshimov jyly lebizin bildirip, Tuńǵyshbaı Jamanqulov Qazaqstan teatr qaıratkerleri odaǵynyń «Dara» medalin tabystady. Rásimde festıval qonaǵy Sábıra Maıqanovanyń qyzy Gúldár Ábdilqyzyna qurmet kórsetildi. Sondaı-aq Qazaqstannyń eńbek sińirgen artısi, «Qurmet» ordeniniń ıegeri, Qyzylorda qalasynyń qurmetti azamaty Baqytbek Alpysbaevqa «Parasat» ordeni tabystaldy.
Festıval 25-30 sáýir aralyǵynda ótedi. Oǵan Grýzııa, Rýmynııa, Qyrǵyzstan memleketterinen, Jezqazǵan, Semeı, Aqtóbe, Atyraý, Taldyqorǵan, Qostanaı jáne Almaty oblystarynan teatrlar qatysady.
Baǵdarlamada Ostrovskıı, Shekspır, Markes, Aıtmatov syndy álem jáne túrki ádebıetiniń klassıkteriniń týyndylary, sondaı-aq qazirgi qazaq dramatýrgııasynyń úzdik shyǵarmalary kórermenge usynylady. Teatrsúıer qaýym drama, tragedııa, komedııa, performans jáne eksperımentaldy qoıylymdardy tamashalaı alady.
Eske salaıyq, 100 jyl buryn Qyzylorda astana atanǵanda qala halqynyń sany qansha ekeni týraly jazǵan edik.