Qyzylordada «ART-Sport» shyǵarmashylyq jáne sporttyq úıirmelerine «Face ID» baqylaý júıesi engizilýde

ASTANA. KAZINFORM – Memleket basshysynyń tapsyrmasymen memlekettik shyǵarmashylyq úılerdi, sporttyq sektsııalardy jan basyna qarjylandyrý jumystary nátıjesin berip keledi. Búginde shyǵarmashylyq úılerdegi úıirmelerge 23 myńǵa jýyq bala qamtylsa, sporttyq sektsııalarǵa 14 myńnan astam bala qatysýda.

Ónim berýshilerge baqylaý jasaý arqyly óner, bilim alýshy balalardyń ortalyqtarǵa tolyqqandy qatysýy jáne memleket qarjysyn únemdi paıdalanýǵa múmkindik beretin «Feıs-baqylaý» mobıldi qosymshasy 2023 jyldyń shilde aıynda Qyzylorda oblysy boıynsha mektepke deıingi bilim berý uıymdarynda óz nátıjesin berip, bilim berý salasynda memlekettiń 3,7 mlrd teńge qarajaty únemdeldi.

Joba óziniń tıimdiligin dáleldep, jańa tsıfrly sheshimder basqa salalarda da engizýge daıyn ekendigin kórsetti.

Bıyldan bastap osy joba mádenıet, sport salalaryna da qoldanysqa engiziledi.

Baǵdarlamany engizýdiń negizgi maqsaty - bıýdjet qarajatyn tıimdi jáne maqsatty jumsalýyn qamtamasyz etý.

Byltyr prokýratýranyń tekserýimen 40-qa jýyq ónim berýshilerden jalǵan balalardy tirkeý faktileri anyqtaldy. Onyń ishinde birazy óz erkimen moıyndap bıýdjet qarjysyn qaıtadan bıýdjet kirisine qaıtarǵandar boldy. Kelispegenderge qatysty qylmystyq is qozǵaldy. Áli kúnge deıin qylmystyq protsester júrip jatyr.

Aıta ketý kerek, mobıldi qosymshasynyń derekter bazasynda aldyn ala tirkelgen sandyq beınege sáıkes, betti bıometrııalyq oqý arqyly balalardy avtomatty túrde tanıdy. Baǵdarlamanyń mobıldi qosymshasymen skanerden ótken beıne sandyq beınege (kod) aýysyp, dereý qaýipsiz serverge saqtalýǵa jóneltilip, ǵalamtor men áleýmettik jeliler arqyly taramaýyna kepildik berilgen.

Málimetter bazasy, baǵdarlamalyq jasaqtama, balalardyń aty-jóniniń ornyna balalarǵa tirkeý nómiri qoldanylady (mysaly: 12345678; 23456789 jáne t.b.). Osylaısha derekqorda jeke tulǵany biregeı túrde anyqtaı alatyn jeke derekter joq.

«FaceID» mobıldik qosymshasymen skanerleý barysynda ortasha eseppen 1 balaǵa 5-7 sekýnd qana jetkilikti, al, bir toptaǵy 25 balaǵa 2-3 mınýt ýaqyt qana qajet etiledi.

Mobıldik qosymshanyń blokqa túsip qalý yqtımaldyǵy óte tómen, mobıldik qosymsha úzilissiz jumys isteý úshin rezervtik servermen qamtamasyz etilgen.

Búgingi kúni, oblysymyzdaǵy 230 aýyldyq eldi mekenniń 210-y mobıldi ınternetpen (2G, 3G 4G, ADLS, VOLS, Spýtnık) tolyq qamtamasyz etilgen.

Al, 20 aýyldyq eldi meken tek baılanys jelisimen qamtylǵan.

«Face ID» mobıldi qosymshasy barlyq mobıldi operatorlardyń ınternet jelisiniń eń tómengi (E) jyldamdyǵynda qoldanylýǵa múmkindigi bar.