Qyzylordada Art sport baǵdarlamasyna bólinetin qarjy eki ese únemdeledi

QYZYLORDA. KAZINFORM – Búgin Amanat partııasy Qyzylorda oblystyq fılıaly janyndaǵy partııalyq baqylaý komıssııasy men sybaılas jemqorlyqqa qarsy is-qımyl jónindegi aımaqtyq keńestiń birlesken otyrysy ótti. Onda Art sport baǵdarlamasynyń júzege asyrylý barysy sóz boldy.

Buqaralyq sportty damytý, balalardyń sport úıirmelerine tegin barýy, osy maqsatqa bólingen memleket qarjysynyń ıgerilýi jóninde oblystyq dene shynyqtyrý, sport jáne týrızm basqarmasynyń basshysy Baqtııar Artaev baıandama jasady. 

Onyń aıtýynsha, balalar men jasóspirimderge arnalǵan shyǵarmashylyq jáne sporttyq tapsyrys aıasynda 2021-2025 jyldarǵa oblys boıynsha 28,6 mlrd teńge qarjy qaralǵan. Onyń 12,1 mlrd teńgesi ıgerilip, 7 mlrd teńge bıýdjetke qaıtarylǵan. Ótken jyly 5,2 mlrd teńge jumsalsa, bıyl bul soma eki ese únemdeledi. 

– Arnaıy jumysshy toby bul baǵyttaǵy jumystardy tekserdi. Nátıjesinde 310 kásipkerdiń 215-imen kelisimsharttar birjaqty buzylǵan. Qazirgi ýaqytta Art Sport baǵdarlamasyna 52 kásipker tartylǵan. Zańsyzdyqtardyń aldyn alý maqsatynda úıirmeler men sport sektsııalaryna Face ID júıesi ornatyldy, – dedi basqarma basshysy. 

Jıynǵa qatysýshylar usynystaryn jetkizdi. Oblystyq máslıhattaǵy depýtattyq fraktsııa múshesi Baljan Shámenova baǵdarlama sharapaty qala, kent, aýdan ortalyqtarymen shektelmeı, aýyldarǵa da jetý kerek ekenin atap ótti.

– Oǵan bólingen qarjynyń ıgiligin qala men aýdan ortalyqtaryndaǵy balalar ǵana kórip otyrǵan sekildi. Sebebi shalǵaı aýyl mektepterinde dene shynyqtyrý sabaǵynan basqa balalardyń sportpen shuǵyldanýyna múmkindik joq. Aýyl balalary aýylda týǵanyna kináli emes. Sondyqtan baǵdarlamany eldi mekenderge deıin jetkizip, aýyl balalary da onyń jemisin kórýi kerek, – dedi Baljan Shámenova.

Buǵan deıin Qyzylorda oblysynda balalar men jasóspirimderge arnalǵan shyǵarmashylyq úıirmelerge memlekettik tapsyrysty ornalastyrý boıynsha zerdeleý jumystarynda birqatar kemshilikter anyqtalǵan edi.