Qyzylordada araq-sharap satylmaıtyn aýylda bes jyldan beri qylmys tirkelmegen

QYZYLORDA. KAZINFORM – Qyzylorda oblysy Jańaqorǵan aýdanynyń Ózgent aýylynda on shaqty jyldan beri araq satylmaıdy. Al sońǵy bes jylda birde-bir qylmys tirkelmegen.

Ózgent aýyldyq okrýgine qarasty eki eldi meken bar. Ózgentte 170-ten astam otbasy tútin tútetip otyr, jalpy turǵyndar sany myńnyń ústinde. Aqsýat aýylynda 600-den astam turǵyn bar, bul degenimiz — 100-ge tarta otbasy.

– Ózgentte 3, Aqsýatta 1 dúken bar. 10 jyl boldy, eshbirinde ishimdik satylmaıdy. Basynda qıyndyqtar boldy. Aýyldyń ardagerler uıymy, qoǵamdastyq músheleri, belsendi azamattardyń qoldaýymen bastalǵan is nátıje berip, turǵyndar bir pátýaǵa keldi, – dedi Ózgent aýyldyq okrýginiń ákimi Erkebulan Jaqudaev.

Eki aýylda da meshit bar. Jastar bos ýaqytyn shaǵyn sport alańdarynda, mektepterdegi voleıbol, kúres úıirmelerinde ótkizedi. Araq-sharaptan bas tartqan aýylda bes jyldan beri qylmys ta tirkelmepti.

– Ózim osynda týyp-óstim. Al polıtsııada 3 jyldan beri eńbek etip kelemin. Dúkenderdiń barlyǵy ishimdik ataýlyny sóreden alyp tastady. Bul tájirıbe nátıjesiz emes. Aýylda tynyshtyq ornaǵan, – dedi Jańaqorǵan aýdandyq polıtsııa bóliminiń ýchaskelik polıtsııa ınspektory Baqbergen Erǵashuly.

Oblystyq polıtsııa departamentiniń málimetinshe, aımaqta araq-sharaptan bas tartqan 5 eldi meken bar. Olar – Aral aýdanyndaǵy Sazdy, Shıeli aýdanyndaǵy Jıdeliaryq, Jańaqorǵan aýdanyndaǵy Manap, Qosúıeńki jáne osy Ózgent aýyldary. Sonyń barlyǵynda sońǵy bes jylda birde-bir qylmys tirkelmegen.

Al jaqynda Іshki ister mınıstriniń orynbasary Igor Lepeha alkogoldik ishimdikten tolyqtaı bas tartqan aýyldardyń sanyn jarııalady.