Qyzylordada aptap ystyq qashan basylady
QYZYLORDA. KAZINFORM — Sınoptıkter Qyzylorda oblysynda aptap ystyqtyń beti qashan qaıtatynyn aıtty.
Sońǵy eki-úsh kún boıy qyzylordalyqtardan maza qashty. Kún de ystyq, tún de ystyq.
— Iran aýmaǵynan kelgen jyly aýa massasynyń áserinen óńirde joǵary aýa temperatýrasy baıqaldy. Oblys ortalyǵy men barlyq aýdanda aýa temperatýrasy 40, 45ºS-den asty. Aptap ystyq 17, 18 maýsym kúnderi saqtaldy. Búgin oblystyń ońtústiginde aýa temperatýrasy 46ºS-ge deıin kóterildi, — dedi «Qazgıdromet» RMK oblystyq fılıaly meteoboljaý bóliminiń bastyǵy Áıgerim Jókelova.
Mamandar búgin esesine aımaqtyń soltústigi men batysynda elimizge salqyn aýa massasynyń enýine baılanysty aýa temperatýrasy azdap tómendeıtinin aıtty. Osylaısha aldaǵy ýaqytta aptaptyń basylatyn túri bar.
— 19, 20, 21 maýsym kúnderi ystyqtyń beti qaıtady. Túnde 18-23 ºS, kúndiz 30-35ºS-ge deıin tómendeıdi. Sonymen qatar oblys aýmaǵynda jańbyr jaýyp, naızaǵaı oınaıdy. Sekýndyna 15-20 metr jyldamdyqpen jel soǵýy múmkin, — dedi Áıgerim Jókelova.
Alaıda, maýsym aıynyń úshinshi onkúndiginde aýa temperatýrasy qaıtadan kóteriledi. «Qazgıdromettiń» málimetinshe, túnde 25-30ºS, kúndiz 38-43ºS-ge deıin joǵarylaıdy. Jaýyn-shashyn jyldaǵy mólsherden az túsedi degen boljam bar.
Buǵan deıin 18 maýsymda Qyzylorda oblysynyń soltústiginde, ortalyǵynda naızaǵaı oınap, shańdy daýyl turatynyn jazǵanbyz.