Qyzylordada apatty úılerde qansha adam turyp jatyr
QYZYLORDA. KAZINFORM — Qyzylorda oblysynda saraptama qorytyndysymen apatty dep tanylǵan 69 kóppáterli turǵyn úı bar.
Oblystyq energetıka jáne turǵyn úı-kommýnaldyq sharýashylyq basqarmasynyń málimetinshe, onyń basym bóligi Qyzylorda qalasynda. Atap aıtqanda, oblys ortalyǵynda qulaǵaly turǵan 63 baspana bar. Apatty jaǵdaıdaǵy úılerdiń 3-i Qarmaqshy, 2-i Syrdarııa, 1-i Jalaǵash aýdanynda.
— Turǵyn úı kezeginde jalǵyz baspanasy apatty dep tanylǵan 673 turǵyn tirkelgen. 2024 jyly oblystyq bıýdjetten 1,7 mlrd teńge qarjy bólinip, 2025 jyldyń naýryz aıynda 135 páter tabystaldy. Apatty jaǵdaıdaǵy 3 úı buzyldy. Bıyl 135 páter satyp alýǵa oblystyq bıýdjetten 1,7 mlrd teńge qarjy qaraldy, — delingen habarlamada.
Óńirdegi 1505 kóppáterli baspananyń 601-i kúrdeli jóndeýdi talap etedi. Kórsetkish 2011 jylǵy 73%-dan 40%-ǵa tómendedi.
— 2024 jyly respýblıkalyq bıýdjettik kredıt esebinen 33 kópqabatty turǵyn úı kúrdeli jóndeýden ótti. Onyń 18-i Qyzylorda qalasy. Aralda 6, Jalagashta 2, Syrdarııa aýdanynda 7 úı jańa keıipke endi. 2025 jyly 14 úıdi kúrdeli jóndeýden ótkizý úshin 1,4 mlrd teńgege bıýdjettik ótinim usynyldy, alaıda qarjy bólinbedi, — dep málimdedi basqarma.
Bıyl 24 kópqabatty turǵyn úıdi kúrdeli jóndeýden ótkizý maqsatynda QR Ónerkásip jáne qurylys mınıstrligine 4,0 mlrd teńgege bıýdjettik ótinim usynyldy.
Eske salaıyq, jýyrda Qazaqstanda apatty jaǵdaıdaǵy úılerdiń sany qansha ekenine Ónerkásip jáne qurylys mınıstrligi jaýap berdi.
