Qyzylordada Antıkorda jumys istegen adamǵa para bergen ımam qyzmetinen bosatyldy
QYZYLORDA. KAZINFORM - Bul qylmystyq is Qyzylorda qalasynyń №2 sotynda qaraldy.
Oǵan qatysty is QR Qylmystyq kodeksiniń 24-babynyń 3-bóligi, 367-babynyń 2-bóligimen (para berý) qozǵaldy.
«Jergilikti meshittiń birinde qyzmet atqarǵan N.-ǵa týysy S. habarlasady. QR Sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentiniń Uıymdastyrý-baqylaý basqarmasynyń asa mańyzdy ister jónindegi ofıtseri-jedel kezekshisi qyzmetin atqarǵan ol N.-ǵa qatysty qyzmettik hattyń bar ekenin alǵa tartady. Sol maqsatta jalǵan jasalǵan qyzmettik hatty kórsetedi. Onda sottalýshy N. dinı teris aǵym ókilderimen qarym-qatynasta jáne olardan aqsha alyp turady degen kúdik bar ekeni málimetter bar. Onyń eki áıelimen birge turatyny jazylyp, bala-shaǵasyn asyraý úshin aqshany qaıdan alatyny jáne tabys kózi kúmán týdyratyny jóninde kórsetilgen. Osyndaı mátinmen jazylǵan hatta QR Sybaılas jemqorlyqqa qarsy is-qımyl agenttigi tóraǵasy orynbasarynyń atynan qol qoıylyp, mór basylǵandyǵy kórsetilgen», - dep atap ótti Qyzylorda qalasynyń №2 sotynan.
Vedomstvo málimetinshe, óz kezeginde týysy sottalýshyǵa hatta kórsetilgen tekserý amaldaryn júrgizbeý úshin para retinde 2 mln teńge talap etken. Sottalýshy N. óziniń eshqandaı teris aǵym ókilderine qatysy joq ekenin aıtyp, óz qyzmeti boıynsha quqyq qorǵaý organdary tarapynan tekserýdi boldyrmaý úshin para retinde 1 000 000 teńge qolma-qol bergen.
«Alaıda, ol óziniń jáne týysynyń áreketi jónsiz ekenin uǵynyp, óz erkimen osy qylmys týraly aryz jazǵan. Týysy óziniń avtokóligi ishinde alǵan aqshasyn keri qaıtaryp bergen. Bul jasyryn tergeý áreketteriniń nátıjesimen qujattaldy. Sottalýshy N. QR Qylmystyq kodeksiniń 24-babynyń 3-bóligi, 367-babynyń 2-bóligimen kináli dep tanyldy. Al 367 baptyń eskertýinde kórsetilgen talapqa sáıkes jáne QPK-niń 35-baby 1-bóligi 12)-tarmaǵyna sáıkes qylmystyq jaýaptylyqtan bosatyldy», - dep tolyqtyrdy sottan.
Bul jóninde Qazaqstan musylmandary dinı basqarmasy tómendegishe túsinikteme berdi.
«Sybaılas jemqorlyqqa qarsy qyzmet qyzmetkerine para bergeni úshin kináli dep tanylǵan ımam bıylǵy jylǵy 12 qyrkúıekten bastap jumys berýshiniń bastamasymen jumystan shyǵarylǵan. QMDB óz qyzmetkerleriniń jeke ómirine aralaspaıdy. Sondyqtan ımamnyń áıeliniń sany týraly málimetter joq. Buǵan baılanysty QMDB otbasyn qurý máseleleri boıynsha eń aldymen QR Konstıtýtsııasy men qoldanystaǵy zańnamany, sondaı-aq sharıǵat zańdaryn basshylyqqa alady. Burynǵy ımamnyń destrýktıvti dinı aǵymdardyń ókilderimen baılanysy jáne olardan aqshasyn alý týraly aqparat joq», - dep kórsetilgen habarlamada.
Sondaı-aq, Qyzylorda oblysynda qurylysy uzap ketken jol boıynsha tekserý júrip jatyr.
