Qyzylordada alıment óndirý boıynsha 500-den astam is tıisti baqylaýsyz qalǵan
QYZYLORDA. KAZINFORM – Qyzylorda oblysynda alıment óndirý baǵytyndaǵy jumystardy uıymdastyrýda birqatar júıeli kemshilikter anyqtaldy.
Oblys prokýratýrasynyń uıymdastyrýymen oblys prokýrory Rızabek Ojarovtyń tóraǵalyǵymen alıment óndirý máselelerine arnalǵan kóshpeli alqa májilisi ótti. Jıynǵa oblys ákiminiń orynbasary Ardaq Zebeshev, Ádilet departamentiniń, jeke sot oryndaýshylardyń óńirlik palatasynyń basshylary men ókilderi qatysty.
Kezdesý barysynda balalardyń quqyqtaryn qorǵaý, alıment óndirýdiń tıimdiligin arttyrý jáne qasaqana jaltaryp júrgen boryshkerlerge qatysty sharalardy kúsheıtý máseleleri qaraldy.
Prokýratýra júrgizgen taldaý nátıjesinde atqarýshylyq óndiristerdi júrgizý kezinde qaıtalanatyn zań buzýshylyqtar anyqtalǵan.
– 500-den astam alıment óndirý týraly óndiris atqarýshylyq is qozǵaý qaýlysyn qabyldaýmen ǵana shektelip, ári qaraı tıisti jumystar júrgizilmegen, – dep habarlady oblystyq prokýratýra.
Tekserý barysynda 12 boryshkerdiń jalaqysyna óndirip alý sharalary qoldanylmaǵany, 45 adamnyń múlki men bank shottaryna shekteý qoıylmaǵany jáne 362 boryshkerge shetelge shyǵýǵa tyıym salynbaǵany belgili boldy.
Máselen, Baıqońyr qalasynda mıllıon teńgeden astam bereshegi bar boryshkerge ýaqytynda shekteý qoıylmaǵandyqtan, ol birneshe ret Ózbekstanǵa baryp kelgen. Sonymen qatar keıbir jaǵdaılarda boryshkerlerdiń sheteldik tirkeýdegi kólikteri bola tura, olardyń qaryzyn óndirý boıynsha sharalar qabyldanbaǵan.
Jıynda qasaqana alıment tóleýden jaltaryp júrgen azamattardy ákimshilik jáne qylmystyq jaýaptylyqqa tartý jumystarynyń jetkiliksizdigi de synǵa alyndy.
– Alqa májilisinde Bas Prokýrordyń qasaqana jaltarǵan boryshkerlerdi ákimshilik jáne qylmystyq jaýaptylyqqa tartý tártibi týraly nusqaýy túsindirilip, osy baǵyttaǵy birlesken is-qımyl jospary men jumys algorıtmi talqylandy, – delingen prokýratýra habarlamasynda.
Jıyn qorytyndysynda ýákiletti organdarǵa alıment óndirý jumystaryn kúsheıtý, qaskóı boryshkerlerge qatysty zań talaptaryn qatań qoldaný jáne azamattardyń ótinishterine jedel den qoıý jóninde naqty tapsyrmalar berildi.
Aıta keteıik, BQO turǵyny alıment tólemegeni úshin 6 aıǵa bas bostandyǵynan aıyryldy.
