Qyzylordada áleýmettik kómek alýshylar azaıǵannan 370,3 mln teńge únemdeldi

QYZYLORDA. KAZINFORM — Prezıdent tapsyrmasymen memleket tarapynan beriletin áleýmettik kómek alýshylardy anyqtaý baǵytyndaǵy jumys jalǵasyp jatyr.

Monıtorıngtik toptardyń jumysy nátıjesinde Qyzylorda oblysynda kómek alýshylar sany ótken jyldyń osy kezeńimen salystyrǵanda 33,1%-ǵa azaıdy, 370,3 mln teńge qarjy únemdeldi.

Oblystyq jumyspen qamtýdy úılestirý jáne áleýmettik baǵdarlamalar basqarmasynyń málimetine súıensek, jyl basynan beri 3 708 otbasyǵa 1 263,6 mln teńge kóleminde ataýly áleýmettik kómek berildi. Sondaı-aq sol otbasylardaǵy bir jastan alty jasqa deıingi 5 920 balaǵa 170,1 mln teńge qosymsha tólem tólendi.

— Kommýnaldyq qyzmet shyǵynyn óteý úshin bıyl bıýdjetten 482,7 mln teńge qarajat bólinip, 705 otbasyǵa nemese 2 myńnan astam adamǵa 38,8 mln teńge shamasynda turǵyn úı kómegi tólendi. Jergilikti atqarýshy organdardyń sheshimi boıynsha áleýmettik qoldaýdy qajet etetin jekelegen sanattaǵy 8 633 adamǵa 877,3 mln teńgege áleýmettik kómek berildi. Bıýdjetten tys kózderden kómekke muqtaj toptaǵy 5 242 adamǵa 140,7 mln teńge kóleminde qaıyrymdylyq kómek kórsetildi, — delingen habarlamada.

Oblys ákiminiń granty úshin 100 talapkerge 2025-2026 oqý jylyna oblystyq bıýdjetten 104,1 mln teńge bólindi. Olardyń oqý aqysy jáne júrip-turýyna, tamaq shyǵynyna 72 aılyq eseptik kórsetkish kóleminde áleýmettik kómek kórsetiledi. Mamandar bıyl bólingen bilim granttarynyń 70%-ǵa jýyǵy jumysshy mamandyqtaryna baǵyttalǵanyn aıtyp otyr.

Buǵan deıin 2025 jyldyń birinshi toqsanyndaǵy jaǵdaı boıynsha Qyzylorda oblysyndaǵy bir qyzmetkerdiń ortasha aılyq ataýly jalaqysy 354 856 teńge ekenin habarladyq.