Qyzylordada alaıaqtyqtyń ashylý kórsetkishi 31,2%-ǵa jaqsarǵan
QYZYLORDA. KAZINFORM — Qyzylorda oblysynda jyl basynan beri 85 ınternet-alaıaqtyq tirkeldi, bul ótken jylǵydan 9,6%-ǵa tómen.
Oblystyq polıtsııa departamentiniń málimetinshe, qylmystyń 70,1%-y ashyldy, ıaǵnı kórsetkish ótken jylǵydan 31,2%-ǵa jaqsarǵan.
— Ótken jyldar sanatyndaǵy 7 qylmystyq is ashylyp, ashylý kórsetkishi +75%-ǵa joǵarylady. Ǵalamtor jelisine júrgizilgen monıtorıng nátıjesinde zańǵa qaıshy belgileri bar 876 saıt jáne silteme anyqtalyp, buǵattaý úshin «Kıberbaqylaý» júıesine engizildi, — dedi departament bastyǵynyń birinshi orynbasary, polıtsııa polkovnıgi Serik Toqtybaev.
Polıtsııa qyzmetkerleri ınternet-alaıaqtyq qylmystarynyń aldyn alý maqsatynda jergilikti atqarýshy organdarmen birlesip halyq arasynda profılaktıkalyq sharalar turaqty túrde júrgizilip kele jatqanyn atap ótti.
— Halyq kóp shoǵyrlanatyn oryndarda 4 myńǵa jýyq jadynama, «SOS» dabyl batyrmasy arqyly saqtyq sharalary jóninde aýdıo-habarlamlar taratyldy. Áleýmettik jelilerde, sondaı-aq áleýmettik jelilerdegi 3 myńnan 80 myńǵa deıingi qatysýshysy bar chattar men toptarda profılaktıkalyq sıpattaǵy beınerolıkter men jadynamalar júıeli túrde jarııalanyp keledi, — dedi departament ókili.
Kıberqylmystyń keń taralǵan túrleri, sonyń ishinde qońyraýlar, messendjerler jáne jalǵan saıttar arqyly jasalatyn alaıaqtyq shemalar týraly da sóz boldy.
— Eń bastysy — qarapaıym qaýipsizdik erejelerin saqtaý qajet. SMS-kodtardy eshkimge berýge bolmaıdy. Eger belgisiz adam habarlasyp, qandaı da bir qosymshany júkteýdi surasa, birden bas tartý kerek. Sebebi ol arqyly alaıaqtar sizdiń telefonyńyzdy qashyqtan basqarýy múmkin. Kúmándi qońyraý túsken jaǵdaıda birden baılanysty úzip, banktiń resmı nómirine habarlasý qajet, — dedi Serik Toqtybaev.
Eske salaıyq, buǵan deıin Atyraý qalasynyń turǵyny sot úkimimen alaıaqtyq jáne azǵyrý tásilimen laýazymdy adamǵa aıtarlyqtaı mólsherde para berýge kóndirip, aıdap salǵany úshin kináli bolyp tanyldy.
