Qyzylordada alaıaqtyq isi boıynsha 406 dropper anyqtaldy

QYZYLORDA. KAZINFORM — Qyzylordada alaıaqtardyń arbaýyna túsken 289 jábirlenýshiniń 298 mln teńgeden astam nesıe tólemi oblystyq prokýratýra usynysymen is boıynsha protsestik sheshim qabyldanǵansha toqtatyldy. Buǵan qylmystyq-protsessýaldyq kodekstiń 200-babynyń talaby negiz boldy.

Qadaǵalaýshy organnyń baspasóz qyzmeti málimdegendeı, alaıaqtyq isi boıynsha 406 dropper anyqtalyp, sonyń 380-i boıynsha sotqa deıingi shaǵymdar tústi.

«Antıfrod-ortalyǵyna kúmándi esepshot tranzaktsııalaryn buǵattaý úshin 1422 ıntsıdent berilip, 1279 esepshot buǵattaldy. 2,4 mlrd teńge zalaldyń 1,5 mlrd teńgesi tergeý barysynda qaıtaryldy, óndirý úlesi — 63%», delingen habarlamada.

Qylmystyń sebep-saldary, onyń aldyn alý baǵytyndaǵy is-sharalar ulttyq bank, qarjy naryǵyn retteý jáne ekinshi deńgeıli bankter men mıkro qarjy uıymdarynyń ókilderi qatysqan úılestirý keńesinde qaraldy.

«Kıberpol» jumysy jolǵa qoıylǵaly jábirlenýshilerdiń aryzyn qabyldaý, isti jyldam tergeý tıimdiligin kórsetip otyr. Byltyr oblysta kópepızodty alaıaqtyqpen aınalysqan 3 adamǵa qatysty tergeý aıaqtalyp, is sotqa joldandy», delingen habarlamada.

Buǵan deıin Qyzylorda qalasynda ornalasqan halyqaralyq Qorqyt ata áýejaıynyń basshylyǵy alaıaqtyq qaýpi týraly eskertip, kópshilikke odan saqtanýǵa úndegen edi.