Qyzylordada alaman báıgeniń júldegerine 4 mln teńgeniń sertıfıkaty tabystaldy
Búgin Qyzylordada qala kúni men «Altyn dán – 2023» merekesine oraı alaman báıge uıymdastyryldy. Jankúıerler ıppodromǵa jınalyp, báıgeniń kórigin qyzdyrǵan tulparlar shabysyn qyzyqtady, dep habarlaıdy Kazinform.
Qyzylorda oblysy ákiminiń baspasóz qyzmetinen málim etkendeı, osy joly ulttyq at sportynyń 4 túrinen 82 shabandoz baq synady. Elimizdiń birneshe aımaǵynan sáıgúligin baptap kelgender qyzylordalyqtarǵa erekshe kóńil kúı syılady.
Oblys ákimi Nurlybek Nálibaev jerlesterin quttyqtap, jarysqa qatysýshylarǵa sáttilik tiledi.
«Sońǵy jyldary ulttyq sporttyń oblysymyzda buqaralyq sıpat alǵany qýantady. Jalpy 16 myńnan astam adam at sportymen shuǵyldanady. Jyl saıyn 8000-nan asa balýannyń qatysýymen ótetin qazaq kúresinen «Altyn belbeý» týrnıri eń tanymal sharaǵa aınaldy. Oblys ortalyǵynda ulttyq jáne at sporty túrleri boıynsha sport klýby qyzmet kórsetedi. Ortalyqta jastarǵa barlyq múmkindik jasalǵan», - dedi aımaq basshysy.
5 shaqyrymdy artqa tastaǵan taı jarys pen 11 shaqyrymdyq qunan báıgede shıelilik Abzal Turǵanbek birinshi bolyp keldi.
Al 15 shaqyrymdy ońaı eńsergen top báıgede Almaty oblysynan kelgen tarlan Abzal Turmys máre syzyǵyna eń alǵash bolyp jetip, 2 mıllıon teńge ıelendi.
Alaman báıgeniń júldesi jalaǵashtyq batyr Jańasyl Bekbolatqa buıyrdy. Shabandozǵa 4 mıllıon teńgeniń sertıfıkaty tabystaldy.
