Qyzylordada ákimdik jóndelip qoıǵan kóshelerdi qaıtadan jóndeýge 1,7 mlrd teńge bólgen

Qyzylorda qalalyq prokýratýrasy 1,7 mlrd teńge qarjynyń negizsiz jumsalýyna jol bermedi, dep habarlaıdy Kazinform.

Qyzylorda qalasynyń prokýratýrasy memlekettik satyp alý salasynda zańdylyqtyń saqtalýyna taldaý júrgizdi.

Nátıjesinde buryn ortasha jóndeý júrgizilgen kóshelerge qarajat bólingeni belgili boldy.

Qalalyq prokýratýranyń aralasýynan keıin memlekettik satyp alýdyń kúshi joıylyp, 1,7 mlrd teńge bıýdjet qarajatynyń negizsiz jumsalýyna jol berilmedi.

«Qyzylorda qalasyna qarasty Qyzyljarma aýyl okrýgindegi Batyrbaev kóshesine 2020 jyly 49 mln teńgege ortasha jóndeý jumysy júrgizilgen. Tıisti zańa sáıkes avtokólik jolyna kúrdeli jóndeý aralyq merzimi — 6-9 jyl. Atalǵan talaptarǵa qaramastan Qyzyljarma aýyl okrýginiń ákimdigi bıyl Batyrbaev kóshesine kúrdeli jóndeý jumystaryn júrgizýge 653,9 mln teńgege memlekettik satyp alý jarııalaǵan. Osyǵan uqsas zańbuzýshylyqtar Ábenov, Doshojın jáne Seksenbaev kóshelerine kúrdeli jóndeýge 1 mlrd teńge qarajat bólý kezinde anyqtaldy», — dep málim etti Qyzylorda oblystyq prokýratýrasynan.

Vedomstvo málimetinshe, qabyldanǵan sharalardyń nátıjesinde jalpy somasy 1,7 mlrd teńgeni quraıtyn 4 satyp alý konkýrsynyń kúshi joıylǵan.

Eske salsaq, budan buryn Qyzylorda oblysynda bilim salasynyń laýazymdy tulǵalary 200 mln teńge jymqyrǵany anyqtalǵan edi.