Qyzylordada aqyly jolda kólik ıelerinen 22 mln teńge bereshek óndirildi
QYZYLORDA. KAZINFORM — Qyzylorda oblysynda «Qyzylorda-Shymkent» aralyǵyndaǵy aqyly avtojolda tranzıttik júk kólikteri júrgizýshilerinen 5 aıda 22 mıllıon teńge bereshek óndirildi.
«QazAvtoJol» ulttyq kompanııasynyń oblystyq fılıaly men kóliktik baqylaý ınspektsııasy mamandary kúrejolda baqylaýdy kúsheıtti.
Aqyly jolǵa tólem jasamaı júrgen tranzıttik júk kólikteri anyqtalsa, olardyń qozǵalysyna shekteý qoıylady.
«Aıta ketsek, Qyzylorda-Shymkent baǵytyndaǵy tórt jolaqty aqyly retinde belgilengen. Jol boıynda óz erkimen tólemeıtin azamattar kezdesedi. Tranzıttik avtokólikterden kúnine ony óndirý barysynda 2 mıllıonǵa deıin aqsha túsip jatyr», — dedi «Qajservıs» JShS Qyzylorda oblystyq fılıalynyń dırektory Nurbol Abyzbaev.
Respýblıkalyq mańyzdaǵy avtojolda jazǵy maýsymda aýyr júk kólikteriniń qozǵalysyna tańerteńgi 10.00-den 22.00-ge deıin shekteý qoıylǵan.
Sondaı-aq bir bilikke túsetin salmaq 9 tonnadan aspaýy kerek.
Oblysta zań talaptaryna baǵynbaı asyra júk tıep alý derekteri tyıylmaı tur.
«5 maýsymnan „Nazar aýdaryńyz, aýyr salmaq avtokóligi!“ aktsııasy bastaldy. Inspektsııamen qazirgi tańda 60-qa jýyq salmaqty parametrlerin saqtamaǵan derekter anyqtaldy. Respýblıkalyq bıýdjetke 23 mıllıondaı óndirildi», — dedi oblystyq kóliktik baqylaý ınspektsııasy basshysynyń orynbasary Gúlmıra Pirnazarova.
