Qyzylordada akademııalyq teatr jetpisinshi maýsymyn aıaqtady
QYZYLORDA. KAZINFORM — Qyzylorda qalasyndaǵy N.Bekejanov atyndaǵy qazaq akademııalyq mýzykalyq drama teatry jetpisinshi maýsymyn támamdady. Bul týraly oblystyq mádenıet, arhıvter jáne qujattama basqarmasynan habarlady.
Teatrdyń kezekti maýsymynda shyǵarmashylyq ujym kórermenge jeti jańa qoıylym usyndy. Onyń ishinde H. K. Andersenniń «Usqynsyz úırek» qýyrshaq qoıylymy, Á.Asanovtyń «Óz-aǵa» derekti dramasy, A. N. Ostrovskııdiń «Naızaǵaı» dramasy, E. R. Raspeniń balalar men eresekterge arnalǵan «Mıýnhgaýzenniń álemi» ertegisi jáne taǵy basqa qoıylymdar bar.
— 2025 jyldyń alǵashqy jartysynda teatr ujymy kásibı belsendilik tanytyp, shyǵarmashylyq tabystarǵa qol jetkizdi. Artıster túrli deńgeıdegi baıqaýlar men mádenı is-sharalarda bıikten kórinip, joǵary jetistikterimen erekshelendi. Teatrdyń 70 jyldyq mereıtoıy aıasynda «Syrdyń Sábırasy — І» atty halyqaralyq festıvaldi uıymdastyrdy, — delingen habarlamada.
Óner ujymy jetpisinshi maýsymyn jańa formattaǵy jańa joba — «Bir tolqyn» atty kontsert- spektakldiń premerasymen qorytyndylady.
Al jýyrda Qyzylordada qalanyń Qazaq avtonomııaly keńestik sotsıalıstik respýblıkasynyń astanasy bolǵanyna 100 jyl tolýyna oraı «Úsh dáýirdiń astanasy — Qyzylorda» atty respýblıkalyq aqyndar aıtysy ótti.