Qyzylordada «AI-KERIM» oqý-saýyqtyrý ortalyǵy paıdalanýǵa berildi
QYZYLORDA. KAZINFORM - Búgin oblys ákimi Murat Ergeshbaev, Parlament Senaty men Májilisiniń depýtattary Rýslan Rústemov, Murat Ábenov, Marhabat Jaıymbetov, máslıhat depýtattary, zııaly qaýym ókilderi men el aǵalary Memleket basshysynyń qoldaýymen salynǵan, jyl boıy úzdiksiz qyzmet kórsetetin «AI-KERIM» oqý-saýyqtyrý ortalyǵynyń ashylý rásimine qatysty.
Oqý jyly aıaqtalýǵa jaqyn qalǵanda oqýshylar demalysyn tıimdi uıymdastyrý úshin iske qosylǵan ortalyq Prezıdent saıabaǵy aýmaǵynda ornalasqan. Qurylysy byltyr qyrkúıek aıynda sol kezdegi aımaq basshysy Nurlybek Mashbekulynyń bastamasymen qolǵa alynǵan bolatyn.
Búginde óńirde 180 myńǵa jýyq mektep oqýshysy bar. Olar jazǵy demalysyn qyzyqty ári paıdaly ótkizýi úshin keshendi jumys josparlanǵan. Bıyl 170 myńnan astam jetkinshektynyǵý lagerlerine, 150 myńǵa jýyǵy mektep janyndaǵy lagerlerde demalady. Óńirde 7 lager jumys isteıdi.
Rásimde oblys ákimi jańa ortalyq jas urpaqtyń jan-jaqty damýyna, demalysyna jáne bos ýaqytyn tıimdi ótkizýine múmkindik beretin mańyzdy joba ekenin atap ótti.
- Búgin Prezıdent saıabaǵy aýmaǵynda Memleket basshysynyń qoldaýymen jyl boıy úzdiksiz qyzmet kórsetetin oqý-saýyqtyrý ortalyǵyn ashyp otyrmyz. 10 mlrd teńgege salynǵan jańa nysannyń materıaldyq-tehnıkalyq bazasy álemdik ozyq standarttarǵa tolyq sáıkes keledi. 300 oryndyq ortalyq aýmaǵynda 5 myń sharshy metrge jýyq ákimshilik ǵımarat, aýqymdy is-sharalarǵa arnalǵan ıvent-aımaq, 4 jaıly jataqhana jáne qonaqúı úlgisindegi ǵımarat bar. Sonymen qatar balalardyń demalysyn tıimdi uıymdastyrý úshin barlyq qajetti ınfraqurylym men zamanaýı jabdyqtar ornatylyp, demalys aımaqtary jasaqtalǵan. Aldaǵy ýaqytta 17 myńnan astam sharshy metr aýmaǵy tolyq abattandyrylyp, kógaldandyrylady. Halyqaralyq Balalardy qorǵaý kúni qarsańynda ashylyp otyrǵan bul ortalyq Memleket basshysynyń qoldaýymen jas urpaqqa jasalǵan tamasha tartý, – dedi Murat Nálqojauly.
Oqý-saýyqtyrý ortalyǵynyń basty ereksheligi – qasynda zamanaýı standarttarǵa saı Botanıkalyq baqtyń bolýy. Munda balalardyń ekologııalyq bilimin jetildirýge jáne ósimdikterdiń ekojúıedegi mańyzyn túsindirýge baǵyttalǵan oqý-tanymdyq jumystar júrgiziledi. Ońtústik Afrıka, Ortalyq jáne Ońtústik Amerıka, Qytaıdan ákelingen ósimdikter ósiriledi.
Prezıdent saıabaǵy aýmaǵy da Qyzylordadaǵy qarqyndy qurylys alańyna aınalǵan. Turǵyn úıler, áleýmettik nysandar, demalys oryndary birtindep boı kóterip keledi. Oqý-saýyqtyrý ortalyǵy – mundaǵy iske qosylǵan alǵashqy nysan.
Keıingi jyldary aımaqta Memleket basshysynyń jáne Úkimettiń qoldaýymen 200-ge jýyq áleýmettik nysan salynǵany belgili. Bir ǵanabilim berý salasynda 43 nysan paıdalanýǵa berildi. Olardyń qatarynda Prezıdent bastamasymen qolǵa alynǵan «Keleshek mektepteri» ulttyq jobasy aıasyndaǵy 10 mektep,fızıka-matematıka baǵytyndaǵy «Bilim-ınnovatsııa» lıtseı-ınternaty, mýzykalyq kolledjdiń jańa oqý ǵımaraty men jataqhanasy, «Oqýshylar saraıy» jáne «Syr juldyzdary» akademııasy bar. Jalaǵash, Jańaqorǵan jáne Shıeli aýdandaryndaǵy «Oqýshylar úıi» men «Óner mektebi» jas jetkinshekterdiń shyǵarmashylyq jáne zııatkerlik áleýetin damytýǵa qyzmet etip jatyr.
Rásimde Murat Abdýlamıtuly, Rýslan Rústemuly, memleket jáne qoǵam qaıratkeri Murat Baqtııaruly sóz sóıledi. Bilim berý salasynyń damýyna eleýli úles qosqan ustazdar qaýymy, jańa nysan qurylysyn merziminde aıaqtaǵan merdiger mekeme qyzmetkerleri oblys ákiminiń Alǵys hatymen marapattaldy.
