Qyzylorda ákimdigi aǵashtar nege qýraǵanyn túsindirdi
QYZYLORDA. KAZINFORM – Qyzylorda qalasynda qalany abattandyrý baǵytynda otyrǵyzylǵan aǵashtardyń shirip jatqany týraly jergilikti turǵyndar men belsendiler dabyl qaǵyp másele kótergen bolatyn. Osyǵan baılanysty Kazinform tilshisi qala ákimdigine habarlasyp, jaǵdaıdy bilgen edi.
Ákimdik ókilderine habarlaýynsha, oblys ortalyǵynda kógaldandyrý jumysy josparǵa sáıkes júrip jatqanyn málimdedi.
Statıstıkaǵa súıensek, jyl basynan beri qala aýmaǵynda 46 myńnan astam tal egildi. Kóshetterdi saqtaý, kóbeıtý jáne júıeli túrde kútip-baptaý maqsatynda qala ákimdigi men «Kazstroy Capital Kyzylorda LTD» JShS arasynda 5 jyl merzimge memlekettik-jekemenshik áriptestik kelisimsharty jasaldy. Joba aıasynda barlyq aǵash qujattandyryldy.
- Tekserý nátıjesinde álsiz, aýrý jáne qýraǵan aǵashtar anyqtaldy. Olardyń jaǵdaıyn bilý úshin ǵylymı qorytyndy ázirlenip jatyr. Jyl saıyn kóktem jáne kúz mezgilderinde aımaqtyń klımattyq jaǵdaıyna beıimdelgen, onyń ishinde qurǵaqshylyqqa tózimdi aǵash túrleri, sonymen qatar terekter egiledi. Aǵash túrleri mamandar keńesine qaraı tańdalady. Jasyl jelek avtomatty, mehanıkalyq ádispen jáne qolmen sýarylady. Búgingi kúni 40 shaqyrym jerge avtomattandyrylǵan sýarý jelileri ornatylǵan,-delingen habarlamada.
Sondaı-aq onda jyl sońyna deıin jasyl jelekti taǵy 20-30 shaqyrym jerge aparý josparlanyp otyrǵandyǵy aıtylǵan.
-Maýsymdyq kútip-baptaý, atap aıtqanda topyraqty qopsytý, tyńaıtqysh sebý jumysy júrgiziledi. Jekelegen taldardyń qýraýynyń negizgi sebebi — aptap ystyq, topyraqtyń qatty tuzdy bolýy jáne ylǵal sińirýge kedergi keltiretin karbonatty qabattyń bolýy. Máseleni sheshý baǵytynda topyraq aýystyrý jumysy qolǵa alyndy. Jerasty sýynyń tuzdylyǵy joǵary bolǵannan qalanyń keıbir bóliginde aǵashtar sý tasýshy tehnıkanyń kómegimen sýarylady, - delingen habarlamada.
Sondaı-aq Qyzylordada sýarý júıesin jańǵyrtý jáne qurǵaqshylyqqa tózimdi aǵash túrlerin kóbeıtýge baılanysty is-sharalar atqarylyp jatqany málim boldy.
