Qyzylordada adam papıllomasy vırýsyna qarsy 2 myńǵa jýyq ekpe salyndy
QYZYLORDA. KAZINFORM – QR Bas memlekettik sanıtarııalyq dárigeriniń 2026 jylǵy 13 mamyrdaǵy №7 qaýlysyna sáıkes adam papıllomasy vırýsyna qarsy ekpe alatyndar kontıngenti artty. Buǵan halyqtan túsetin ótinishterdiń jıileýi sebep bolǵan.
Qyzylorda oblysynyń Sanıtarııalyq-epıdemıologııalyq baqylaý departamentinen málimdegendeı, ekpe medıtsınalyq qarsy kórsetilimder eskerilip, bilim berý uıymdarynyń medıtsınalyq, medıtsınalyq uıymdardyń egý kabınetterinde júrgiziledi. Eger mundaı oryndarda egý pýnkti bolmasa, salqyndatý tizbegin saqtaýǵa jaǵdaı jasalmasa, oǵan qarasty adamdar úshin kóshpeli egý brıgadalary uıymdastyrylady. Ekpe úshin 4 valentti «Gardasıl» ekpesi qoldanylady. Birinshi doza kez kelgen kúni, ekinshi doza birinshi dozadan keıin arada 2 aı, al úshinshisi birinshi dozadan keıin arada 6 aı ótkende júrgiziledi.
- Elimizde adam papıllomasy vırýsyna qarsy vaktsınatsııa 11 jastaǵy qyzdar arasynda josparly túrde, 12-13 jastaǵy qyzdar arasynda tolyqtyra ımmýndaý 2024 jyldan bastap júrgizilip keledi. Jyl basynan beri oblysta 11-13 jastaǵy qyzdarǵa 2 myńǵa jýyq profılaktıkalyq ekpe salyndy. Onyń 1604-i birinshi dozany, 1213-i ekinshi dozany qabyldady. Vaktsına alǵandar arasynda ımmýndaýdan keıin baıqalatyn qolaısyz kórinister tirkelgen joq, - dedi departament basshysynyń orynbasary Álııa Ábdiqaıymova.
Vaktsınatsııa úshin ekpe alatyn adamnyń óziniń nemese zańdy ókili retinde ata-anasynyń kelisimi kerek.
- Adam papıllomasy vırýsy – óte keń taralǵan ınfektsııa qozdyrǵyshtarynyń biri. Ol kóbine uzaq ýaqyt boıy esh belgisiz ótip, keıin jatyr moıny obyry, sondaı-aq basqa da qaýipti aýrýlardyń damýyna sebep bolýy múmkin. Dúnıejúzilik densaýlyq saqtaý uıymy oǵan qarsy vaktsınatsııany aýrýdyń aldyn alýdaǵy eń tıimdi tásil retinde usynady. Mundaı vaktsına kóptegen elde birneshe jyldan beri qoldanylyp keledi. Onyń qaýipsizdigi men tıimdiligi halyqaralyq zertteýler arqyly dáleldengen. Vaktsına jasóspirim shaqta, ásirese, erte jasta salynsa, aǵzada vırýsqa qarsy turaqty ımmýnıtet qalyptasady. Sondyqtan ata-analardy qyz balasynyń densaýlyǵyna jaýapkershilikpen qarap, profılaktıkalyq ekpeniń mańyzyn túsinýge shaqyramyz, - dedi Álııa Ábdiqaıymova.
Al buǵan deıin Almatyda 15 myń qyz adam papıllomasy vırýsyna qarsy vaktsına aldy.
