Qyzylordada 8 jekemenshik balabaqsha jabyldy

QYZYLORDA. KAZINFORM – Bıyl 8 aıda Qyzylorda oblysynda mektepke deıingi 97 bilim berý uıymynda memlekettik attestattaý júrgizildi. Onyń 79-y (82,3%) synaqtan ótpese, 8 jekemenshik balabaqsha jabyldy.

Oblystyq bilim salasyndaǵy sapany qamtamasyz etý departamenti memlekettik baqylaý sharalarynyń qorytyndysyn jarııalady.

– Soǵan sáıkes biliktilik talaptaryna sáıkes kelmeıtin 1 memlekettik balabaqsha, 3 bastaýysh mektep jabyldy. 9 balabaqsha reestrden shyǵaryldy, 3 bastaýysh mekteptiń lıtsenzııasyn qaıtarý boıynsha jumys atqarylyp jatyr. Biliktilik talaptaryna sáıkes kelmeıtin, tıimsiz, bilim sapasy óte tómen bilim berý uıymdaryn jabý nátıjesinde jergilikti atqarýshy organ 1 jylda 1 mlrd teńgege deıin qarjy únemdedi, - dedi departament basshysy Ǵalııa Dáýletova.

Qazan-qarasha aılarynda óńirdegi 3 jeke mektepte memlekettik attestattaý júrgizilip, 1 mekteptiń talapqa sáıkestigi tekseriledi.

– Búgingi kúni respýblıka boıynsha jekemenshik mektepterdiń 40%-y jalǵa alynǵan ǵımarattarda ornalasqan. Muny qaýipsizdik pen ınfraqurylym turǵysynan táýekel dep esepteýge bolady. Mınıstrlik lıtsenzııalyq talaptarǵa ózgeris engizip, jaldamaly ǵımarattarda mektep ashýǵa tyıym salýdy josparlap otyr. Memleket sapaly bilim beretin, bilim salasynda zańnama talaptaryn saqtaıtyn jáne balalardyń múddesin basty orynǵa qoıatyn jeke mektepterdi ǵana qoldaýdy jalǵastyrady, - dedi departament basshysy.

Memlekettik attestattaý aıasynda 48 mekteptiń 4-eýinde oqýshylar keshendi testileýdiń shekti deńgeıinen óte alǵan joq. Olar jyl sońynda qaıtadan synaqtan ótedi. Qyzylorda qalalyq jáne Qarmaqshy aýdandyq bilim bólimderin tekserý nátıjesinde anyqtalǵan zańbuzýshylyqtardy 1 qazanǵa deıin qalpyna keltirýge ýaqyt berildi.

Buǵan deıin oblystyq bilim basqarmasy josparly monıtorıng qorytyndysyn jarııalap, jeke balabaqshalar men mektepterge baqylaý kúsheıtiletinin málimdedi.