Qyzylordada 72 jyl buryn salynǵan demalys parki 6,3 mlrd teńgege jóndeldi
QYZYLORDA. KAZINFORM — 1 maýsym — Balalardy qorǵaý kúninde Qyzylordada qaıta jańǵyrtýdan ótken qalalyq mádenı-demalys parki ashyldy. Bul týraly qala ákimdiginen habarlady.
Attraktsıon parki 1953 jyly ashylǵan. 1996 jyly jekeshelendirilip, 2008 jyly memleket menshigine qaıtaryldy.
Bıyl merdiger «Bi Global» kompanııasy jobalyq-smetalyq qujatqa sáıkes ony tolyq jóndep, park jańarǵan keıipke endi. Bul jumysqa 6,3 mlrd teńge bólindi.
— Kireberis qaqpa aldyndaǵy «Syr batyrlary» eskertkishi Taǵzym alańyna kóshirildi. Ol jerge arka ornatylyp, jańa úlgidegi kespetas tóseldi. Qorshaý tolyq jańartyldy. Betondy skeıtpark, 20-ǵa jýyq attraktsıon, kafe ǵımaratyn ornalastyrýǵa arnalǵan alań jáne oıyn alańdary salyndy. Jańa sýburqaqtar parktiń barlyq aýmaǵyn qamtıdy. Ashyq aspan astynda kúndelikti kelýshilerge mádenı qyzmet kórsetýge, kontserttik baǵdarlamalar qoıýǵa arnap 100 adamǵa laıyqtalǵan amfıteatr salyndy, - delingen ákimdik habarlamasynda.
Aıta keteıik, Prezıdent Qasym-Jomart Toqaev búgin qazaqstandyqtardy Balalardy qorǵaý kúnimen quttyqtap, memleket balalardyń jan-jaqty damýyna barlyq jaǵdaıdy jasaı beretinin jetkizdi.