Qyzylordada 72 jastaǵy áıelden 5 kılogramm kısta alyndy

QYZYLORDA. KAZINFORM – Kópbeıindi Qyzylorda oblystyq aýrýhanasynda kezekti kúrdeli ota sátti aıaqtaldy. Bul týraly aýrýhananyń baspasóz qyzmeti habarlady.

Dárigerler 72 jastaǵy áıeldiń oń jaq analyq bezinen salmaǵy 5 kılogramm bolatyn isikti aldy.

- Jalpy áıelderde túrli jaǵdaılarǵa baılanysty ártúrli kısta kezdesedi. Analyq bez kıstasy — analyq bez qurylymynda paıda bolyp, onyń kólemin birneshe ese arttyratyn suıyqtyq nemese jartylaı suıyq quramy bar kópirshik tárizdi massa. Biz patsıentke laporotomııalyq ádispen ota jasadyq. Ol kisi aýrý janyna batsa da osyǵan deıin shydap júre bergen. Mundaı jaǵdaı ártúrli jasta kezdese beredi. Tipti jaqynda 18 jastaǵy qyzdan da alyndy, - dedi gınekolog dáriger Aıdos Qamzıev.

Otany hırýrg dáriger, PhD, aýrýhana basshysynyń hırýrgııa jónindegi orynbasary Erbol Serikuly bastaǵan mamandar jasady. Patsıent otadan keıin palataǵa shyǵaryldy. Dárigerler onyń densaýlyǵyn turaqty dep baǵalap otyr.

Buǵan deıin de osy aýrýhana dárigerleri mıksoma dep atalatyn qatersiz isikti alyp tastaǵan edi.