Qyzylordada 7 myń adam tegin beriletin dárilik zattarmen qamtamasyz etilmegen
QYZYLORDA. KAZINFORM - Qyzylorda oblysynda tegin medıtsınalyq kómektiń kepildik berilgen kólemi sheńberinde 7 myńnan astam adamnyń dárilik zattarmen qamtamasyz etilmegeni anyqtaldy.
Qyzylorda oblysynyń prokýratýra organdary dárilik zattar aınalymy salasyndaǵy zańnamanyń saqtalýyna tekseris júrgizdi. Nátıjesinde tegin medıtsınalyq kómektiń kepildik berilgen kólemi sheńberinde oblystyń 7 myńnan astam turǵynynyń dárilik zattarmen qamtamasyz etilmegeni anyqtaldy.
«Qyzylorda qalasynyń emhanalarynda balalardyń jas shamasy eskerilmeı, 1 myńnan astam kámeletke tolmaǵanǵa negizsiz dári-dármek taǵaıyndalǵan. Medıtsınalyq kórsetimsiz 170 naýqas ınsýlın preparattarymen qamtamasyz etilgen. Odan bólek 68 dana medıtsınalyq preparattyń saqtaý talaptary buzylyp, 2 naýqasqa jaramdylyq merzimi ótken dárilik zattar taǵaıyndalǵan. Óńirdiń 14 medıtsına uıymynda zańsyz farmatsevtıkalyq qyzmetpen 19 jumysker aınalysqan. Anyqtalǵan zańdylyqty buzýlar boıynsha ýákiletti organǵa prokýrorlyq qadaǵalaý aktileri engizilip, qaraý nátıjesimen 93 tulǵa jaýaptylyqqa tartylǵan», - dep málim etti oblystyq prokýratýradan.
Eske salsaq, budan buryn Qyzylordada turǵyn úı kezeginen negizsiz shyǵarylǵan múgedek jannyń quqyǵy qorǵaldy.
