Qyzylordada 60 mln teńgeni jymqyrǵan sharýashylyq basshysy qamaldy
QYZYLORDA. KAZINFORM — Qarjylyq monıtorıng agenttiginiń Qyzylorda oblysy boıynsha departamenti mal sharýashylyǵy salasyndaǵy ınvestıtsııalyq jobany iske asyrýǵa bólingen qarajattyń qoldy bolǵanyn anyqtady.
2021 jyly «Baıqońyr» ÁKK» AQ-nyń qatysýymen «Syzdyq ata» JShS birlesken kásiporny qurylǵan. Jobanyń jalpy quny — 311 mln teńge.
— Ol et baǵytyndaǵy mal sharýashylyǵyn damytýǵa jáne Jańaqorǵan aýdanynyń turǵyndaryn qoljetimdi baǵadaǵy sapaly et ónimderimen qamtamasyz etýge baǵyttalǵan. Joba aıasynda korporatsııa seriktestiktiń jarǵylyq kapıtalyna 151,5 mln teńge salǵan. Bul qarajatqa 1600 qoı, 130 iri qara mal jáne et qaptaıtyn jabdyq satyp alýy kerek bolǵan. Tergeý derekterine sáıkes mal satyp alynǵannan keıin seriktestik basshysy qarajattyń bir bóligin shyǵarý shemasyn uıymdastyrǵan. Nátıjesinde jalpy somasy 60 mln teńge kúdiktiniń baqylaýyndaǵy «Nuraı» jáne «Abylaıhan» JK shottaryna zańsyz aýdarylyp, qolma-qol aqshaǵa aınaldyrylǵan. Kúdikti qamaýǵa alyndy. Sot sanktsııasymen oǵan tıesili eki avtokólikke tyıym salyndy, — delingen departament habarlamasynda.
Qylmystyq is sotqa joldandy. Qylmystyq protsessýaldy kodekstiń 201-babyna sáıkes tergeý múddesine oraı ózge aqparat jarııa etilmeıdi.
Al jýyrda Qyzylorda oblystyq Polıtsııa departamenti uıymdasqan qylmysqa qarsy kúres basqarmasynyń qyzmetkerleri oblystyq prokýratýrasynyń úılestirýimen uıymdasqan qylmystyq topty quryqtaǵanyn jazǵanbyz.
