Qyzylordada 56 balanyń áleýmettik quqyqtary qalpyna keltirildi
QYZYLORDA. KAZINFORM — Qyzylorda oblysynda múgedektigi bar balalardyń quqyqtaryn qorǵaý barysynda zań buzýshylyqtar anyqtaldy.
Oblystyq prokýratýra balalarǵa arnaýly áleýmettik qyzmet kórsetetin ortalyqtaǵy zań talaptarynyń saqtalýyna tekserý júrgizgen.
Nátıjesinde balalardy qajetti gıgıenalyq quraldarmen qamtamasyz etý, kadrlyq rásimder jáne memlekettik satyp alý salalarynda birqatar zań buzýshylyq anyqtaldy.
— Atap aıtqanda, qoldanystaǵy talap boıynsha jambas organdarynyń fýnktsııalary buzylǵan múgedektigi bar adamdarǵa táýligine 4 jórgek berilýi tıis. Alaıda ortalyqta balalarǵa kúnine 2-3 jórgekten ǵana berilgen. Prokýrorlyq qadaǵalaý sharalary nátıjesinde zań buzýshylyqtar joıylyp, 56 balanyń buzylǵan quqyqtary qalpyna keltirildi. Jaýapty tulǵalar zańda belgilengen tártippen jaýapkershilikke tartyldy, — delingen habarlamada.
Osyǵan deıin Qostanaı prokýratýrasy 13 kásipkerdiń quqyǵyn qorǵaǵanyn jazǵan bolatynbyz.
