Qyzylordada 501 myńnan astam adam máslıhat saılaýyna qatysady
KAZINFORM. KAZINFORM - Ortalyq saılaý komıssııasynyń tóraǵasy Nurlan Ábdirov Qyzylorda oblysyna sapary kezinde 29 qarashaǵa taǵaıyndalǵan máslıhat depýtattarynyń kezekten tys saılaýyna daıyndyq barysymen tanysty.
Oblystyq aýmaqtyq saılaý komıssııasy málimdegendeı, Nurlan Ábdirov aldymen jergilikti atqarýshy jáne quqyq qorǵaý organdary basshylarynyń, oblystyq jáne qalalyq aýmaqtyq saılaý komıssııalary ókilderiniń qatysýymen aldaǵy saılaýdy uıymdastyrý jáne ótkizý máselelerin talqylady. Odan keıin aýmaqtyq jáne okrýgtik saılaý komıssııalarynyń ókilderimen kezdesti.
Sonymen qatar Qyzylorda qalasyndaǵy birqatar saılaý ýchaskesin aralap, olardyń aldaǵy daýys berýge daıyndyǵyn zerdeledi. Saılaý ýchaskelerin aralaý barysynda daýys berýge arnalǵan úı-jaılardyń jaı-kúıi, komıssııa músheleriniń jumys jaǵdaıy, qajet qural-jabdyqtardyń bolýy, aqparattyq materıaldardyń ornalastyrylýy jáne saılaýshylarǵa, onyń ishinde múgedektigi bar azamattarǵa qolaıly jaǵdaı jasaý máseleleri nazarda boldy.
- Óńirde saılaýshylardy aqparattandyrý jáne olardyń saılaý quqyqtaryn júzege asyrýyna járdemdesý maqsatynda tsıfrlyq servıster qoldanylyp keledi. Atap aıtqanda, óńirde azamattarǵa ózderiniń saılaý ýchaskesin anyqtaýǵa múmkindik beretin «Ózińdi saılaýshylar tiziminen tekser» elektrondy platformasy iske qosylǵan. Búgingi tańda oblystyń 70 myńnan astam turǵyny atalǵan servısti paıdalanǵan. Bul qyzmetti «Smart Qyzylorda» mobıldi qosymshasy jáne Telegram-bot arqyly da alýǵa bolady, - delingen habarlamada.
Aıta keteıik, Qyzylorda oblysynda aldaǵy máslıhat depýtattaryn saılaýdy uıymdastyrý men ótkizýge 9 aýmaqtyq, 136 okrýgtik jáne 386 ýchaskelik saılaý komıssııasy tartylǵan. Olardyń quramynda barlyǵy 3 453 komıssııa múshesi jumys isteıdi. Saılaýshylar tizimine 501 myńnan astam azamat engen.