Qyzylordada 500-ge jýyq úıge tegin datchık ornatylady

QYZYLORDA. KAZINFORM — Ótken jylý berý maýsymynda Qyzylorda oblysynyń turǵyn úı sektorlarynda 120 órt oqıǵasy boldy. Bul aldyńǵy jylǵydan 24,1%-ǵa kóp.

Oblystyq tótenshe jaǵdaılar departamentiniń málimetinshe, tilsiz jaý sektor ıelerin 15,5 mln teńgege jýyq shyǵynǵa batyrǵan. 

— 4 adam qaza taýyp, 3 adam jaraqat aldy. Tabıǵı gazdan 3 adam ýlanyp qaıtys bolsa, 5 adam jaraqat aldy. Kómirqyshqyl gazynan ýlaný jaǵdaılary tirkelgen joq. Mundaı keleńsiz oqıǵalar turǵyndardyń qaýipsizdik sharalaryna salǵyrt qaraýynan, ıaǵnı turmystyq peshtiń tehnıkalyq jaǵdaıyn qadaǵalamaýynan, balalardy qaraýsyz qaldyrýynan kóbeıip tur, — dedi departamenttiń memlekettik órt baqylaý basqarmasynyń bastyǵy Ashat Orazbekov.

Qutqarýshylar jańa jylý maýsymy aldynda profılaktıkalyq is-sharalar qarqynyn kúsheıtti. 

— Odan bólek, oblystyq jumyspen qamtýdy úılestirý jáne áleýmettik baǵdarlamar basqarmasy turmysy tómen, kópbalaly, jalǵysbasty ana jáne múgedek jandar turatyn 6 825 otbasynyń tizimin usyndy. Osy otbasylardyń qaýipsizdigin qamtamasyz etý maqsatynda 2024 jyly jergilikti bıýdjet qarajaty esebinen tabıǵı gazdy anyqtaıtyn 484 datchık satyp alyndy. Aldaǵy jylý berý maýsymynda sol qurylǵylardy ornatamyz, — dedi Ashat Orazbekov.

Buǵan deıin jazǵanymyzdaı, Astanadaǵy áleýmettik osal toptaǵy úılerdiń 25%-da órtke qarsy datchık ornatylmaǵan.