Qyzylordada 500-ge jýyq úıge gaz datchıgi tegin ornatyldy
QYZYLORDA. KAZINFORM – Jyl basynan beri Qyzylorda oblysynda 396 órt oqıǵasy tirkeldi. Bul ótken jylǵy kórsetkishten 10%-ǵa kóp.
Oblystyq tótenshe jaǵdaılar departamentinen habarlaǵandaı, tilsiz jaýdan 5 adam qaza taýyp, 10 adam jaraqat aldy.
– Órt oqıǵalarynyń 20-sy jylý maýsymy bastalǵan, ıaǵnı qazan aıynan beri turǵyn úılerde tirkeldi. Abyroı bolǵanda kóz jumǵandar men jaraqat alǵandar joq. Gazdan ýlaný jaǵdaılary da tirkelmedi. Órt oqıǵalary negizinen turǵyndardyń órt qaýipsizdik sharalaryna salǵyrt qaraýynan, ıaǵnı turmystyq peshterdiń tehnıkalyq jaǵdaıyna mán bermeýinen, elektr jelileriniń qysqasha tuıyqtalýynan paıda bolady, - dedi departamenttiń basqarma bastyǵy Ashat Orazbekov.
Órt sóndirýshiler osyǵan deıin óńirdegi 22 myńǵa jýyq turǵyn úıdiń aýlasyn aralap, turǵyndardy qaýipsizdikti saqtaýǵa shaqyrdy.
– Áleýmettik osal toptaǵy 500-ge tarta otbasyǵa jergilikti bıýdjet qarajaty esebinen tabıǵı gazdy anyqtaıtyn datchık satyp alyp, ornattyq. Turǵyndarǵa ony paıdalaný erejesin túsindirdik. Bul datchıkter gazdan ýlaný faktileriniń aldyn alýǵa kómektesedi, - dedi Ashat Orazbekov.
Buǵan deıin ótken jylý maýsymynda Jetisý oblysynda 187 órt tirkelip, 14 adam kóz jumǵanyn jazǵanbyz.