Qyzylordada 500-ge jýyq adam mas kúıinde kólik tizgindegen
QYZYLORDA. KAZINFORM — Jol-kólik oqıǵalarynyń aldyn alý jáne jol qozǵalysy qaýipsizdigin qamtamasyz etý maqsatynda Qyzylorda oblysynda jyl basynan beri 7 jedel-profılaktıkalyq is-shara ótti.
Oblystyq polıtsııa departamentiniń málimetinshe, keshendi is-sharalarǵa qaramastan mas kúıinde kólik basqarýdyń 490 deregi tirkeldi.
— Atalǵan quqyqbuzýshylyqtar boıynsha Ákimshilik quqyq buzýshylyq týraly kodekstiń 608-babynyń 1-bóligine sáıkes 341 júrgizýshige ákimshilik hattama toltyryldy. Zań talaptaryna sáıkes olarǵa 7 jyl merzimge kólik quralyn basqarý quqyǵynan aıyrý jáne 15 táýlikke ákimshilik qamaýǵa alý túrindegi jaza kózdelgen. Kólik quralyn basqarý quqyǵy bolmasa da qaıtadan alkogoldik masań kúıde kólik tizgindegen 20 adamǵa qatysty Qylmystyq kodekstiń 346-babynyń 1-bóligi boıynsha qylmystyq is tirkeldi. Olar ýaqytsha ustaý ızolıatoryna qamalyp, kólik quraldary aıyp turaǵyna qoıyldy, — delingen habarlamada.
Osy oraıda departament azamattardy jol qozǵalysy erejelerin qatań saqtaýǵa, mas kúıinde kólik basqarmaýǵa jáne óziniń de, ózgeniń de ómirine qaýip tóndirmeýge shaqyrady.
Jýyrda Túrkistanda birneshe jylǵa kólik basqarý quqyǵynan aıyrylǵanyna qaramaı mas kúıde rólge otyrǵan júrgizýshi ustaldy.
