Qyzylordada 5 eldi mekenniń ákimderi saılandy
QYZYLORDA. KAZINFORM — 21 maýsym kúni Qyzylorda oblysynda 1 qala, 1 kent, 3 aýyl ákiminiń saılaýy ótti.
Oblystyq saılaý komıssııasy málimdegendeı, Aral aýdanynyń Aral qalasy ákimine 4 kandıdat daýysqa tústi.
— Daýys berýge saılaýshylar tizimindegi 22 989 adamnyń 18 847-si qatysty. Onyń ishinde esepten shyǵarý kýálikteri boıynsha daýys bergen eshkim bolǵan joq. Al 213 adam úı-jaıynan tys jerde tańdaý jasady, 22 bıýlleten jaramsyz dep tanyldy, — delingen habarlamada.
Daýys berý qorytyndysymen Renat Janaev Aral aýdany Aral qalasynyń ákimi bolyp saılandy. Ol buǵan deıin Aral aýdandyq kásipkerlik jáne ónerkásip bólimin basqardy. Saılaýǵa ózin-ózi usynǵan.
Ótken jeksenbide sondaı-aq Shıeli kenti jáne Jıdeliaryq aýyldyq okrýginiń turǵyndary da saıası naýqanda belsendilik tanytty. Shıeli aýdanynyń ortalyǵyn basqarý múmkindigine 3 kandıdat talasty. Olardyń arasynan Amankeldi Ómiráli daýys sany jaǵynan basym tústi. Jıdeliaryq aýyldyq okrýgi ákimin saılaý jónindegi daýystardy sanaý nátıjesinde 3 úmitkerdiń biri Erlan Ábildashev jeńip shyqty.
Osy kúni Jalaǵash aýdanynyń Aqsý jáne Jańatalap aýyldyq okrýgteriniń de ákimderi saılandy.
— Aqsý aýyldyq okrýginiń ákimine 3 kandıdat daýysqa tústi. Aýyldyq okrýg boıynsha saılaýshylar tizimine 1028 azamat engen. Onyń ishinde saılaý bıýlletenderin 671 adam nemese 65,27 paıyzy aldy. Daýys berýge 668 adam qatysty. Kópshilik daýyspen Meırambek Syǵaıbaev Aqsý aýyldyq okrýginiń ákimi bolyp saılandy. Jańatalap aýyldyq okrýginiń ákimine 3 kandıdat daýysqa tústi. Olardyń ishinde Qýanysh Ábdiqalyqov daýys sany jóninen alǵa shyqty, — dep habarlady komıssııa.
Bul azamattardyń barlyǵy — «AMANAT» partııasynyń músheleri, ózin-ózi usynǵan.
Buǵan deıin habarlaǵanymyzdaı, 20 maýsym tynyshtyq kúni boldy. Daýys berý erteńine tańǵy 07.00-den 20.00-ge deıin jalǵasty.
