Qyzylordada 48 myńdaı turǵynǵa ortaq aıaqsý máselesi qalaı sheshiledi
QYZYLORDA. KAZINFORM — Qyzylorda qalasyndaǵy uzyndyǵy 13 800, eni 11 metr Qyzyljarma kanaly 1957 jyly salynǵan.
Oblys ákimdiginen habarlaǵandaı, nysannyń tehnıkalyq jaǵdaıy aıtarlyqtaı tozǵan.
Sý resýrstaryn tıimdi paıdalaný jáne únemdeý úshin kanaldy qaıta jańǵyrtyp, zaman talabyna saı naýamen jabdyqtaý qajettiligi týyndady.
— Osy baǵyttaǵy joba júzege asqanda KBI, Kommýnızm, Shanhaı, Gagarın shaǵyn aýdandary men Qyzyljarma aýyldyq okrýginde turatyn shamamen 48 myńǵa jýyq turǵyn aıaqsýmen qamtamasyz etiledi. Ekinshi jaǵynan bul mal sharýashylyǵyn damytýǵa, baý-baqsha jáne jemis-jıdek egýge, qalanyń ekologııalyq ahýalyn jaqsartýǵa oń áserin tıgizedi. Sýarý maýsymynda kanaldan shamamen 9,3 mln tekshe metr sý jiberiledi. Naýa qoıylǵan soń sý shyǵyny shamamen 50% qysqarady, — delingen habarlamada.
Merdiger«Baq-Bereke 2030» seriktestigi kelisimshart boıynsha ol jerge 14 aı ishinde 9 488 metr naýa ornatyp, 34,3 gektar aýmaqty tazalap, monolıtti temirbeton konstrýktsııalaryn turǵyzýy qajet. Odan bólek jaıaý júrginshilerge arnalǵan kópirler men sý shyǵarý qurylǵylaryn qoıady.
Buǵan deıin biz oblys ortalyǵynda bıyl qandaı kósheler jóndeletini týraly jazǵan edik.