Qyzylordada 4200 sharshy shaqyrym aýmaqta kemirgishter arasynda oba epızootııasy tirkeldi
QYZYLORDA. KAZINFORM — Qyzylorda obaǵa qarsy kúres stantsııasy obaǵa jáne basqa karantındi, asa qaýipti ınfektsııalar boıynsha epıdemııaǵa qarsy is-sharalar júrgizip keledi.
Stantsııanyń zertteý aýmaǵyndaǵy shóleıtti jerlerde munaı ıgerilip jatyr.
— Bul ózge oblystardan, TMD elderinen jumys kúshiniń aǵylýyna sebep. Temir jol, avtokólik magıstraldary, áýejaı arqyly ózge óńirlermen, TMD elderimen baılanys, alys-jaqyn shet eldermen naryq, týrızm, saýda-sattyq baǵytyndaǵy qarym-qatynas nyǵaıyp, oblys boıynsha kóship-qoný úrdisi jandanyp, oba, tyrysqaq nemese basqa karantındi indetterdiń tasymaldaný qaýpin týdyryp otyr. Batys Eýropa-Batys Qytaı avtojoly Qyzylordany kesip ótedi. Munda shekara jasaqtary ornalasqan. Saldarynan turǵyndardyń asa qaýipti juqpaly aýrýlardyń tabıǵı oshaqtarymen qarym-qatynasy odan saıyn ulǵaıa túsedi. Degenmen, adamdar arasynda oba aýrýy tirkelgen joq, — dedi stantsııa basshysy Nurlan Nurmaǵanbetov.
Esesine kemirgishter arasynda túrli deńgeıdegi oba aýrýy epızootııasynyń tirkelýi tyıylmaı tur. Josparǵa sáıkes jylyna 84100 sharshy shaqyrym jer epızootologııalyq zertteýmen qamtylyp, 9-12 myńdaı kemirgish, 15-22 myń shamasynda syrtmasyl tekseriledi.
— 2021-2025 jyldar aralyǵynda 4200 sharshy shaqyrym aýmaqta kemirgishter arasynda oba epızootııasy tirkeldi. Zertteý nátıjesinde 11 oba qozdyrǵyshy bólinip, 124 kemirgishtiń qanynyń sarysýynan oba qozdyrǵyshyna antıdeneler tabyldy. Oba epızootııasy tirkelgen aımaqtarda tıisti epızootııalyq jáne epıdemıologııalyq sharalar ýaqtyly jáne óz deńgeıinde atqaryldy, — dedi stantsııa basshysy.
Bıyl stantsııa baqylaýyndaǵy aýmaqta turaqty qaýipti toptarǵa jatatyn 8793 adam obaǵa qarsy egilýge tıis bolsa, búginde jospardyń 82,4%-y oryndaldy.
Eske salaıyq, Qyzylorda oblysynda juqpaly aýrýlarǵa qarsy josparly egýden bas tartqandar qatary azaımaı tur.
Bıyl 6 aıda olardyń sany ótken jylǵydan 1,7%-ǵa joǵarylady.
