Qyzylordada 40 beınebaqylaý kamerasy jasandy ıntellekt kómegimen jumys istep tur

QYZYLORDA. KAZINFORM – Qyzylorda qalasynda qoǵamdyq qaýipsizdikti qamtamasyz etý, qoǵamdyq oryndardy lastaý faktilerin anyqtaý maqsatynda 272 beınebaqylaý kamerasy ornatylǵan.

Oblystyq polıtsııa departamentiniń baspasóz qyzmeti habarlaǵandaı, onyń 53-i qoqys jáshikteri ornalasqan aýmaqtarda tur.

Jedel basqarý ortalyǵynyń 40 kamerasy jasandy ıntellekt algorıtminiń kómegimen jumys isteıdi. Onyń ishinde beıne aǵynyn óńdeýge, taldaýǵa múmkindik beretin pılottyq rejımdegi Target EYE baǵdarlamasyna qosylǵan. 

– Jyl sońyna deıin taǵy 1400 beınebaqylaý kamerasy ornatylyp, baǵdarlamanyń qoǵamdyq oryndardy lastaý deregin avtomatty túrde anyqtaý fýnktsııasy tolyq iske qosylady – dedi departament bastyǵynyń orynbasary Sábıt Ibadýlla. 

Jyl basynan beri kópshilik oryndardy lastaǵan, abattandyrý qaǵıdalaryn buzǵan 5,5 myńnan astam derek anyqtaldy. 

Oblystyq polıtsııa departamenti jaqynda esirtki qylmysyna qarsy is-qımyl basqarmasy «Kıberqadaǵalaý» aqparattyq júıesi arqyly sıntetıkalyq esirtki zattaryn jarnamalaıtyn 71 saıtty buǵattady.