Qyzylordada 32 jeke mekteptiń teń jartysy jabylyp qaldy
QYZYLORDA. KAZINFORM – Bıyl qańtar aıynda Qyzylorda oblysyndaǵy mektepke deıingi 13 bilim berý uıymy memlekettik attestatsııadan ótti.
Oblystyq bilim sapasyn qamtamasyz etý departamentiniń málimetine súıensek, 9 uıym nemese 69,3%-y synaqtan ótken joq. Aıta keterligi, onyń barlyǵy – jeke balabaqsha.
- Mamyr aıynan bastap bilim berý uıymdaryn memlekettik attestattaý jańa formatta júrdi. Ol 22 balabaqshany qamtydy. 13-ine anyqtalǵan kemshilikterdi 3 aı ishinde zańnama talaptaryna sáıkestendirý mindeti júkteldi, - dedi departament basshysy Mádı Bekmaǵanbetov.
Jyl basynda Qyzylorda oblysynda 32 jeke mektep bar bolatyn. Arada jarty jyl ótpeı jatyp sonyń teń jartysy jabyldy.
- Qańtar-aqpan aılarynda 4-i óz ótinishi negizinde quryltaıshynyń sheshimimen jumysyn toqtatty. Lıtsenzııasy bar, biraq bilim berý qyzmetin toqtatqan jeke mektepter sany – 12. Búgingi kúni 16 jeke mektep bilim berý qyzmetin kórsetip keledi, - dedi departament basshysy.
Osy ýaqyt ishinde jeke azamattardyń joldanymy boıynsha jospardan tys 13 tekserý júrgizildi.
- Mundaı tekserýge jeke mektepterde muǵalimderdi artyq jumysqa tartý, keıbir konkýrstyq qujattardyń durys rásimdelmeýi, konkýrsqa túsken kandıdattardyń nátıjege qanaǵattanbaýy sebep. Balabaqshalarda balalarǵa zııan kelý jaǵdaılary boıynsha ata-analar shaǵymdanady. Tekserý nátıjesinde 30 ákimshilik is qozǵalyp, tekserý qorytyndysymen laýazym ıeleri ákimshilik jaýapkershilikke tartyldy, - dedi Mádı Bekmaǵanbetov.
Jalpy, keıingi kezde Qyzylorda oblysynda jekemenshik mektepter máselesi ýshyǵyp tur. Oǵan áleýmettik jelide qaptaǵan aryz-shaǵym dálel.
