Qyzylordada 300 oryndyq aýrýhana, Prezıdenttik kitaphana jáne jańa teatr salynyp jatyr

Memleket basshysynyń tapsyrmasymen júzege asyrylyp jatqan áleýmettik jáne ınfraqurylymdyq jobalardyń qurylys barysyn tekserdi.

Qyzylorda oblysynda keıingi jyldary salynǵan bilim berý, densaýlyq saqtaý, mádenıet jáne sport nysandary búginde el ıgiligine qyzmet etip jatyr.

Memleket basshysy jyl basynda ótken Ulttyq quryltaı otyrysynda «Meniń tapsyrmammen Qyzylordada 300 orynǵa arnalǵan kópsalaly aýrýhananyń qurylysy bastaldy. Kóp uzamaı 500 oryndyq emhana jáne 200 oryndyq perzenthana salynady» dep áleýmettik salanyń ınfraqurylymyn damytý baǵdaryn belgilegen bolatyn. Bul aýqymdy jobalardyń ár kezeńinde atqarylǵan jumystar Premer-mınıstrdiń baqylaýynda.

Delegatsııa aldymen Prezıdent saıabaǵy aýmaǵyndaǵy toǵyz qabatty 15 turǵyn úıdiń qurylysymen tanysty. Jalpy quny 22 mlrd teńge bolatyn joba respýblıkalyq bıýdjet esebinen qarjylandyrylǵan. Bas merdiger «Melıorator» JShS salǵan turǵyn úı kesheninde 945 páter qarastyrylǵan, jaqynda paıdalanýǵa beriledi.

Jumys sapary kezinde Memleket basshysynyń qoldaýymen salynǵan Botanıkalyq baq ta nazardan tys qalmady. Prezıdent saıabaǵy aýmaǵyndaǵy keshende Qytaı, Japonııa, Ońtústik Afrıka, Aýstralııa, Madagaskar, Ońtústik jáne Ortalyq Amerıkadan ákelingen 92 túrli 3,3 myńnan astam ekzotıkalyq jáne tropıkalyq ósimdik otyrǵyzylǵan. Mıkroklımatty avtomatty basqarýdyń, sýarý jáne sý daıyndaýdyń zamanaýı ınjenerlik júıelerimen jabdyqtalǵan.

Atalǵan aýmaqta elimizdegi úshinshi Prezıdenttik kitaphana men drama teatr boı kóterip keledi.

Qyzylorda qalasynda táýlik boıy jumys isteıtin kitaphana men jańa drama teatr salý Memleket basshysynyń Ulttyq quryltaı otyrysynda bergen tapsyrmasy aıasynda júzege asyrylýda.

Sáýir aıynda ǵımarattyń irgetasy qalanyp, kapsýlasy salyndy.

Investor qarajaty esebinen qurylysyna 20 mlrd teńge qaralǵan kitaphanada zamanaýı oqý jáne konferentsııa zaldary, muraǵat bólimi, baspahana, medıazerthana, podkast stýdııasy bolady. Munda 1 mln-nan astam kitap qory saqtalady.

Jańa drama teatr qurylysyna da 20 mlrd teńge bólingen, ǵımarat 520 kórermenge arnalǵan. Joba boıynsha qoıylym aldy daıyndyq zaldary, stýdııa jáne shyǵarmashylyq keńistikter, ákimshilik kabınetter bar. Túrli janrdaǵy qoıylymdardy sahnalaýǵa qajetti zamanaýı tehnıkamen, qýatty dybys júıesimen jabdyqtalady.

Sondaı-aq Syrdarııa ózeni jaǵalaýyna shaıylýdan qorǵaıtyn arnaıy tirek qurylymdary ornatylýda. Turǵyndarǵa yńǵaıly bolý úshin jaıaý júrginshiler joly men velojolaq salynady. Búginde jumystyń 50%-y aıaqtalǵan.

«Qyzylorda Arena» kópfýnktsıonaldy sport kesheniniń qurylys alańynda da jumys qarqyndy júrip jatyr. Keshende 50 metrlik júzý basseıni, halyqaralyq jarystar ótkizýge arnalǵan 2,5 myń oryndyq ámbebap sport zaly jáne 300 oryndyq konferents-zal ornalasady.

Qazir árleý, metall konstrýktsııalaryn montajdaý, ınjenerlik jáne elektr jelilerin tartý, vıtraj ornatý, aýmaqty abattandyrý jumystary júrgizilýde. Nysandy bıyl paıdalanýǵa berý josparlanǵan.

Sapar barysynda óńirde júzege asatyn jańa ınvestıtsııalyq jobalar da tanystyryldy.

Investorlar Syrdarııanyń sol jaǵalaýynan turǵyn úı keshenin salý, jeldetý jáne aýa baptaý qondyrǵylaryn qurastyrý, sanıtarlyq-tehnıkalyq buıymdar qurastyrý jáne óndirý jobalaryna basymdyq berip otyr. Tomat pastasy men kókónis pıýresi óndirisi agrosalanyń áleýetin arttyrýǵa baǵyttalǵan. Sondaı-aq ınvestorlar suıytylǵan tabıǵı gaz óndirýge, eki qorǵasyn-myrysh taý-ken baıytý zaýytyn, kópfýnktsıonaldy saýda-oıyn-saýyq keshenin salýǵa nıet bildirip, kelissózder júrgizilýde.

Qyzylorda qalasynyń shet aımaǵy Tıtov shaǵyn aýdanyndaǵy №5 qalalyq emhana bir aýysymda 400 adam qabyldaıtyn medıtsınalyq mekemege aınalady. Qurylysqa 9,7 mlrd teńge bólingen. Qazir úshinshi qabattyń monolıtti konstrýktsııalary betondalyp, ishki ınjenerlik jeliler tartylýda.

Taǵy bir emhana Memleket basshysynyń tapsyrmasymen 14 mlrd. 780 mln. teńgege Syrdarııa ózeniniń sol jaǵalaýynan boı kóterip keledi.

Bir aýysymda 500 kelýshini qabyldaıtyn mekemede ambýlatorııalyq-emhanalyq, dıagnostıkalyq jáne kúndizgi statsıonarlyq qyzmet kórsetiledi. Mamandandyrylǵan bólimdermen qatar, 50 tósektik kúndizgi statsıonar, oqý kabınetteri jáne konferents-zal qarastyrylǵan.

Memleket basshysy atap ótken 300 tósektik kópbeıindi aýrýhananyń qurylysy da qarqyndy júrgizilýde. Oǵan 34,9 mlrd. teńge bólingen. Medıtsınalyq keshen quramynda emhana, operatsııa jáne reanımatsııa bólimderi, hımıoterapııa jáne radıoterapııa ortalyqtary, fızıoterapııa, pansıonat jáne ákimshilik bloktar bolady. Qazirgi ýaqytta ishki jáne syrtqy árleý, ınjenerlik júıelerdi montajdaý, keramıkalyq plıtka tóseý, qasbetti qaptaý jáne abattandyrý jumystary jalǵasýda.

Nysandardy aralaý kezinde merdiger mekeme basshylaryna qurylys sapasy men merzimine qatysty talaptardy qatań saqtaý tapsyryldy.

-Ózderińizge belgili, Memleket basshysynyń qoldaýymen óńirdiń densaýlyq saqtaý salasy ınfraqurylymyn damytýda birneshe aýqymdy joba qolǵa alynǵan. Maqsat – medıtsınalyq qyzmetti jurtshylyqqa qoljetimdi etý. Nysandar Memleket basshymyzdyń erekshe nazarynda, Premer-mınıstr qurylystyń ár kezeńin baqylaýda ustaıdy. Bul mekemelerdiń halyqqa sapaly, jan-jaqty qyzmet kórsetýin baqylaý osy qurylys satysynan bastalýy kerek. Ǵımarattar belgilengen merzimde, barlyq talapqa saı kúıinde paıdalanýǵa berilýi tıis. Sonda ǵana emdelýshilerge kórsetiletin qyzmet sapasy minsiz bolmaq, — dedi Nurlybek Nálibaev.

Aıta keteıik, osyǵan deıin Nálibaev Abaı oblysyndaǵy ınfraqurylymdyq jobalardyń júzege asyrylý barysymen tanysqan bolatyn.