Qyzylordada 3 myńnan asa komıssııa múshesi referendýmdy ótkizý tártibin meńgerdi
QYZYLORDA. KAZINFORM — Qyzylorda oblysynyń aýmaqtyq referendým komıssııasy oblys ortalyǵy men aýdandarda kóshpeli oqytý semınaryn ótkizdi.
Komıssııa habarlaǵandaı, 15 naýryzdaǵy respýblıkalyq referendýmdy ótkizýge 9 aýmaqtyq, 378 ýchaskelik komıssııa daıyn. Referendým qarsańynda 157 semınar uıymdastyrylyp, 3252 komıssııa múshesi oqydy.
— Referendým protsesin zań sheńberinde ashyq ári alqaly túrde ótkizý jáne daýys berýdi uıymdastyrý — komıssııa músheleriniń tikeleı mindeti. Prezıdent janyndaǵy memlekettik basqarý akademııasynyń oblystyq fılıalymen birlesken semınarda kásibı lektorlar pýly referendýmdy ótkizý tártibi, daýys berýshi azamattarmen, qoǵamdyq birlestik jáne BAQ ókilderimen jumys jasaý algorıtmi týraly dáris berdi. Komıssııa músheleri sondaı-aq praktıkalyq keısterdi talqylady. Semınarǵa komıssııa tóraǵasy, tóraǵanyń orynbasary jáne hatshylar qatysty. Qalǵan komıssııa músheleri kaskad ádisi arqyly bilimin jetildirdi.
Semınar komıssııa músheleriniń zańnamany bilýine, daýys berýdi uıymdastyrý tártibine negizdelgen. Praktıkalyq keıster men roldik oıyndarǵa basymdyq berildi, — delingen habarlamada.
Qyzylorda qalasyndaǵy jáne aýdandardaǵy quqyq qorǵaý salasynyń ókilderi referendým kezinde quqyqbuzýshylyqty boldyrmaý, daýys berý ýchaskelerinde tártip saqtaý erejelerin túsindirdi.
Aıta keteıik, referendým kúni elimizde 10,4 myń ýchaske jumys isteıdi.
