Qyzylordada 3 mıllıon kóshet bolatyn orman pıtomnıginiń qurylysy aıaqtaldy
ASTANA. KAZINFORM — Jaqynda Ekologııa jáne tabıǵı resýrstar mınıstri E.N. Nysanbaev Qyzylorda oblysyna jumys saparymen bardy. Sapar barysynda mınıstr Aral teńiziniń qurǵaǵan tabanynda júrgizilip jatqan orman – melıoratsııa jumystarynyń barysymen tanysty. Bul týraly vedomstvonyń baspasóz qyzmeti málim etti.
– Mınıstr Qazaly qalasynda ornalasqan, 2024 jylǵy qarashada paıdalanýǵa berilgen orman tuqymbaǵyn aralady. Tuqymbaqtyń jalpy aýdany 33 gektardy quraıdy, onyń ishinde óndiristik alańy 10 gektar. Bul jerde sekseýil tuqymdary sebilip, nátıjesinde Aral teńiziniń qurǵaǵan tabanyna otyrǵyzý úshin 3 mıllıon standartty kóshet alý josparlanǵan. 2023 jyly otyrǵyzylǵan, jalpy kólemi 4 myń gektardy quraıtyn ekpeler qaraldy. Ekpeler ǵylymı usynymdarǵa sáıkes jasalynyp, kelesi otyrǵyzý syzbasy qoldanyldy: qatar aralyǵynyń eni 4 metr, qatar ishindegi aralyq 2 metr, jolaq arasyndaǵy qashyqtyq 30 – 35 metr. Otyrǵyzý jumystary standartty qara sekseýildiń kóshetterimen júrgizildi. Qazirgi ýaqytta ekpelerdiń jaı kúıi qanaǵattanarlyq dep baǵalanady, – delingen habarlamada.
2025 jyly 9 shildede otyrǵyzylǵan, jalpy aýdany 11,8 myń gektardy quraıtyn ekpeler qaraldy. Atalǵan jumystar 2025 jylǵy naýryz aıynda Qazaq-frantsýz birlesken kásiporny «Katko» qarajaty esebinen júrgizilip, munda da uqsas otyrǵyzý syzbasy qoldanylǵan, al ekpelerdiń jaı kúıi jaqsy dep baǵalanyp otyr.
Sondaı-aq, Mınıstr Aral teńiziniń qurǵaǵan tabanynda ornalasqan tuqymbaq qurylysynyń barysymen tanysty. Qazirgi ýaqytta tuqymbaq sýǵarý maqsatynda uńǵymada burǵylaý jumystary júrgizilýde, qyzmetkerlerge arnalǵan modýldik konteınerler jetkizildi. Jumystar belgilengen merzimge saı oryndalady.
Atalǵan tuqymbaq arıdtik (qurǵaq) jaǵdaılarǵa jaqsy beıimdelgen kóshet materıalyn ósirýge jáne tasymaldaý shyǵyndaryn azaıtýǵa múmkindik beredi. Tuqymbaqtyń jalpy aýdany 15 gektardy quraıdy, al óndiristik qýattylyǵy jylyna 1,5 mıllıon dana kóshet ósirýge jetedi.
Sapar barysynda Mınıstr ǵylymı mamandardyń ókilderimen kezdesti. Ǵalymdarmen birge Aral teńiziniń qurǵaǵan tabanynda orman ósirý agrotehnıkasyn jetildirý jáne otyrǵyzylǵan ekpelerdiń jersiný deńgeıin arttyrý máseleleri talqylandy.
Aıta ketý kerek, Mınıstrdiń bastamasymen orman-melıoratsııa jumystaryna turaqty ǵylymı súıemeldeý júrgizý maqsatynda Qyzylorda qalasynda QazOShǴZI fılıaly qurylǵan. Qazirgi ýaqytta onda 2 ǵylymı qyzmetker turaqty negizde jumys istep jatyr.
Sonymen qatar, atqarylǵan jumystardyń turaqtylyǵyn qamtamasyz etý, sondaı-aq qurylǵan ekpelerdi qorǵaý jáne saqtaý maqsatynda Aral orman sharýashylyǵy mekemesi bazasynda «Aral ormany» memlekettik orman tabıǵı rezervatyn qurý arqyly olarǵa erekshe qorǵalatyn aýmaq mártebesin berý josparlanǵan.
Eske sala keteıik, buǵan deıin ǵalymdar Aralǵa sekseýil otyrǵyzý jumysyna joǵary baǵa bergen bolatyn.